Zhvlerësimi i Euros “liron” energjinë për bizneset – Për nëntorit, të lidhurit në 35 KV do të tarifohen me 31.21 lekë/kWh

Çmimet e energjisë për klientët e liberalizuar, të lidhur në tensionin 35 KV që furnizohen nga Furnizuesi i Shërbimit Universal nën rolin e Furnizuesit të Mundësisë së Fundit, do të pësojë një rënie të lehtë për muajin nëntor.

Enti Rregullator i Energjisë miratoi çmimet e reja për këtë kategori, duke përcaktuar se 1 kWh për nëntorin do të kushtojë 31.21 lekë, nga 31.50 lekë që ishte një muaj më parë. Kjo rënie ndikohet nga lëvizjet e kursit të Euros, duke qenë se është pjesë përbërëse e formulës së përllogaritjes së çmimit.

Ndërkaq, ende mbetet e pazgjidhur përfshirja në çmim e kostos së disbalancave, teksa bordi la afat fundin e janarit të vitit që vjen.

Për bizneset e liberalizuar, të lidhur në tensionin 20, 10 dhe 6 KV përmes një vendimi të mëparshëm, ERE ka fiksuar çmimin deri në muajin dhjetor, duke përcaktuar se kjo kategori do të faturohet me 18.26 lekë/kWh.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.