1.5 mld lekë për mbështetjen e investimeve në ferma – Synohet rritja e kapaciteteve të prodhimit dhe modernizimi i proceseve të punës

Ledina Elezi/SCAN

 

Nga Fondi i Programit për Bujqësinë dhe Zhvillimin Rural, fermerët do të mbështeten financiarisht për ndërtimin e serrave dhe stallave, për rrjeta antibreshër, mekanikë bujqësore dhe akuakulturë. Kjo është një nga shtesat në fondin e këtij viti, me qëllim rritjen e kapaciteteve të prodhimit në ferma, nëpërmjet mbështetjes së investimeve.

Fondi total për mbështetjen e investimeve në ferma do të jetë 1.5 miliardë lekë, ku 500 milionë lekë do të përdoren deri në fund të këtij viti.

Konkretisht, kjo mbështetje ofrohet për ndërtimin e serrave të reja diellore me sipërfaqe jo më pak se 0.2 ha dhe jo më shumë se 2 ha për subjekt, përfshirë edhe instalimin e sistemit të ujitjes.

Gjithashtu, parashikohet financimi i blerjes së rrjetave për mbrojtjen e prodhimit nga breshëri në blloqet ekzistuese me pemë frutore, agrume dhe vreshta, por edhe blerja e traktorëve, makinerive dhe pajisjeve për mekanizimin dhe modernizimin e proceseve të punës në fermat bujqësore dhe blegtorale.

Nga ky fond do të mbështetet ndërtimi I ambienteve për mbarështimin e   kafshëve dhe stabilimenteve për rritjen e shpendëve, me kapacitet jo më pak se 10 lopë, jo më pak se 100 të imëta, jo më pak se 10 dosa dhe jo më pak se 10 000 shpendë.

Nga ana tjetër, në financim do të përfshihet edhe akuakultura detare për koshat e rritjes së peshkut. Për të gjitha këto investime masa e përfitimit do të jetë 50% e vlerës totale të faturave tatimore, por me disa shuma limit financimi.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.