305 milionë euro shtesë futen në buxhet 7-mujori/ Cilat janë zërat që ndikuan në rritjen e të ardhurave?

Elisabeta Dosku/ SCAN

Në 7 muajt e parë të vitit buxheti i shtetit ka arkëtuar 402,5 miliardë lekë ose 103 % e planit të periudhës. Krahasuar me të njëjtën periudhë të vitit të kaluar,  rezulton të jenë mbledhur rreth 30.4 miliardë lekë  apo 305 milionë euro më shumë se 7 mujori i vitit 2023.

Të ardhurat tatimore (të ardhurat nga TVSH neto në vend, tatimi mbi fitimin, tatimi mbi të ardhurat personale, taksat nacionalet), për 7-mujorin 2024 u realizuan në masën 130.3 miliardë lek, 12.9 miliardë lekë shumë se 7-mujori i vitit të kaluar. Krahasuar me planin 7 mujor, të ardhurat e mbledhura janë 4 miliardë lek ose 3.2% më shumë.

Të ardhurat nga TVSH e arkëtuar (neto), u realizua në masën 32.7 miliardë lek, 6.3 23.7% më shumë se 7-mujori 2023, çka tregon dhe konsumin në rritje kryesisht përgjatë periudhës së sezonit turistik.

Tatimi mbi të ardhurat personale është arkëtuar në vlerën 38.1 miliardë lekë,  me rritje 15.3% krahasuar me të njëjtën periudhë të një viti më parë, ku ndikim kryesor ka pasur rritja e pagave e cila hyri në fuqi nga muaji Korrik.

Të ardhurat e mbledhura nga kontributet për sigurimet shoqërore dhe shëndetësore (të administruara nga DPT) u realizuan në masën 92 miliardë lek, 9.6 miliardë lek ose 11.6% më shumë se 7-mujori 2023, perfomancë e cila vjen si rrjedhojë e reformës së pagave por edhe luftës ndaj informalitetit.

Të ardhurat e mbledhura nga tatimi mbi fitimin u realizuan në masën 36.1 miliardë lek ose 2.5% më pak se 7-mujori 2023, si dhe 2.2 miliardë lekë ose 6.6% më shumë se plani i 7-mujorit të vitit 2024 për Tatimin mbi Fitimin.
Taksat nacionale, për periudhën 7-mujore 2024 u realizuan në masën 23.3 miliardë lek, 2.5 miliardë lekë më shumë se viti i kaluar.

Të ardhurat doganore (të ardhurat nga TVSH në import, akciza, taksa doganore dhe renta minerare) u realizuan në vlerën 131.2 miliardë lek, 9.6 miliardë lekë me shumë se e njëjta periudhë  enjë viti më parë dhe 0.9% më tejkalim plani.   Të ardhurat nga TVSH në import për 7-mujorin rezultojnë 89.5 miliardë lek, 6.6 miliardë lek njëjta periudhë e një viti më parë,  Të ardhurat nga akciza janë realizuar në masën 34.9 miliardë lek, 3 miliardë lekë më shumë, ndërsa Të ardhurat nga renta minerare në eksport janë realizuar në vlerën 1.6 miliardë lek, me rënie kundrejt një viti më parë dhe kundrejt planit.

Shpenzimet e përgjithshme publike, për periudhën 7 mujore të vitit 2024, arritën në rreth 347.5 miliardë lekë me një realizim në masën 92.3 përqind të planit të periudhës.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.