34 bashki, në “revansh” taksat dhe tarifat – Cilët janë të “mëdhenjtë” me perfomancë pozitive dhe negative?

Vetëm 34 nga 61 bashki, kanë arritur që të kenë një performancë pozitive të mbledhjes së të ardhurave gjatë vitit që lamë pas,  ndërkohë që 27 bashkitë e mbetura kanë pasur një performancë negative në këtë drejtim. Referuar raportit vjetor të hartuar nga Instituti për  Bashkitë e Shqipërisë , të ardhurat e pushtetit vendor nga taksat dhe tarifat u regjistruan në vlerën e 21.1 miliardë lekëve, me një rritje prej 15.7 % në raport me një vit më parë.

Kontributin kryesor në këtë rritje e japin njësitë e cilësuara si “të mëdha”, siç është bashkia Tiranë (+2.3 miliardë lekë), bashkia Durrës (+300.8 milionë lekë) dhe bashkia Kamëz (+702.7 milionë lekë). Nga ana tjetër, performanca negative i atribuohet sërish bashkive të ashtuquajtura “të mëdha” si p.sh. bashkia Vlorë (-178 milionë lekë), bashkia Kukës (-112.2 milionë lekë), bashkia Shkodër (-132.9 milionë lekë) dhe bashkia Korçë (-100.3 milionë lekë).

Situata është pak a shumë e njëjtë dhe për të ardhurat nga taksat, ku kontributi më i madh vjen prej bashkive Tiranë (+1.9 miliardë lekë), Kamëz (+623 milionë lekë) dhe Kavajë (+189 milionë lekë). Perfomacë më të dobët kanë pasur bashkitë Himarë-(-42 milionë lekë), Shkodër(-49 milionë lekë) dhe Vlorë (-138 milionë lekë).

Në kahun e shpenzimeve të kryera nëpërmjet burimeve të veta, 61 Bashkitë shpenzuan rreth 68.3 miliardë lekë në vitin 2023. Krahasuar me një vit më parë, u shpenzuan rreth 9.9 miliardë lekë më shumë ose 17%.

Pjesa më e madhe e shpenzimeve të bashkive janë për paga dhe kontribute të sigurimeve shoqërore dhe shëndetësore me 43.1% pasuar nga shpenzime operative dhe të tjera me 33,3% dhe shpenzime për investime kapitale me 23.6%. E thënë ndryshe për çdo 100 lekë , bashkitë kanë çuar vetëm 23 lekë për investime publike.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.