BE nënshkruan marrëveshjen e bashkëpunimit Frontex me Serbinë!

Bashkimi Europian dhe Serbia kanë nënshkruar një marrëveshje bashkëpunimi operacional për menaxhimin e kufijve me Agjencinë Europiane të Rojës Kufitare dhe Bregdetare (Frontex).

Komisionerja për Çështjet e Brendshme Ylva Johansson dhe zëvendëskryeministri serb dhe ministri i Brendshëm Ivica Daçiç nënshkruan marrëveshjen në Beograd, që do të thotë se Frontex tani mund të punojë më ngushtë me Serbinë.

Johansson theksoi rëndësinë e Serbisë si partnere në menaxhimin e rrugëve të migracionit. Në vizitën e saj të tretë në Serbi, ajo vlerësoi bashkëpunimin e mirë midis policisë kufitare serbe dhe Frontex në luftën kundër krimit, kontrabandës së emigrantëve dhe migrimit të parregullt.

“Marrëveshja e statusit të Frontex që nënshkruam sot do të përmirësojë bashkëpunimin tonë,” tha Johansson. “Nën komandën dhe udhëheqjen e autoriteteve serbe, Frontex do të mbështesë policinë kufitare serbe dhe zbatimin e ligjit në kufijtë me Bosnje Hercegovinën dhe Maqedoninë e Veriut.”

Kjo është marrëveshja e dytë e Serbisë me Frontex dhe, siç tha Daçiq, “forcat policore do të vendosen jo vetëm në kufijtë shtetërorë me Hungarinë dhe Bullgarinë si pjesë e operacionit “Kontinenti i Serbisë, por edhe në kufijtë shtetërorë të Serbisë me vendet e treta”.

Kjo do të kontribuojë ndjeshëm në “luftën kundër krimit ndërkufitar dhe migrimit të parregullt”, shtoi ai.

Frontex ka mbi 480 oficerë të dislokuar në Ballkanin Perëndimor përmes operacioneve të përbashkëta në kufijtë e jashtëm të Bashkimit me Shqipërinë, Maqedoninë e Veriut dhe Malin e Zi; 111 prej të cilave janë vendosur tashmë në Serbi në një operacion të përbashkët në vazhdim sipas marrëveshjes së mëparshme të statusit me Serbinë në kufirin me Hungarinë dhe Bullgarinë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.