A preket “Urdhri i Mjekëve” nga ndryshimet e Aktit Normativ? – “Të ngrihen në protestë”, Shehu: Ta kundërshtojnë, është i paligjshëm!

Diamila Leka/ Scan

Në Komisionin për Punën, Çështjet Sociale dhe Shëndetësinë u mbajt seanca dëgjimore me përfaqësues të Urdhrit të Mjekut lidhur me aktin normativ “Për disa ndryshime dhe shtesa në ligjin “Për urdhrin e mjekëve në Republikën e Shqipërisë”.

“Asambleja e përgjithshme një zëri në unanimitet të plotë thekson mosdakordësinë tonë, për mënyrën, shpejtësinë dhe momentin e papërshtatshëm, të bërjes dhe miratimit të këtij akti normative pa u konsultuar dhe pa marrë sugjerimet tona si palë e interesuar direct me të. Ndryshimet ligjore dhe shtesat e bëra në aktin normativ, tranformojnë tërësisht thelbin, tiparet, karakterin, rolin, misionin dhe funksionin tonë. Për ne pavarësia është tipari thelbësor ku bazohet veprimtaria jonë, si trup e vetë rregullimit dhe vetë qeverisjes profesionale mjekësore.”

Por deputeti Tritan Shehu duke mos u pajtuar me këtë akt normativ, u bën thirrje mjekëve ta kundërshtojnë këtë pasi është i paligjshëm.

“Këtu ka mbaruar gjithçka. Nuk rregullohet më! I bëj thirrjeve kolegëve mjekë që të ngrihen siç u ngritën studentët. Kjo është e paligjshme, antikushtetuese”

Ndërkohë sipas anëtares së komisionit Orjola Pampurit po preket pavarësia e Urdhrit të Mjekut edhe në lidhje me punësimet e mjekëve në mënyrë private pas orarit të punës.

“Nëpërmjet këtij akti normativ ka një kontroll politik të mjekëve. Dhe këtë e shikoj teneni 8 pika “a”, ku thuhet: “Një anëtar i urdhrit të mjekëve që kërkon të ushtrojë profesionin e mjekut në një institucion shëndetësor jopublik, duhet t’i bëjë kërkesë titullarit të institucionit shëndetësor publik ku ai është  i punësuar.” Tani ky mjeku duhet t’i kërkojë leje këtij titullairt për të filluar ose jo për të punuar ose jo privatisht.”

Por për nënkryetaren e komisionit, Klodiana Spahiu ky akt normativ nuk ka ndryshime thelbësore që prekin Urdhrin e Mjekut.

“Ndryshon vetëm struktura dhe kriteret e komisionit disiplinor, madje dhe këtë vetë Urdhri do e hartojë. Nuk ka ndryshim të buxhetit apo pikave të tjera. Bëhet fjalë vetëm për një Komision masash”

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.