AVANCON KORRIDORI 8 – Shpallet fituesi për projektin e lidhjes me Maqedoninë e Veriut

Projekti i zbatimit për një nga segmentet e korridorit 8 do të jetë gati pas më shumë se 18 muajsh. Autoriteti Rrugor Shqiptar ka shpallur kompaninë fituese, që do të duhet të hartojë projektin për aksin nga Bushtrica deri në pikën e re doganore që do të lidhë Shqipërinë me Maqedoninë e Veriut. Ndërkohë që vetëm pasi ai të jetë gati do të mund të kryhen procedurat tenderuese për ndërtimin e tij. Ky është segmenti i fundit i korridorit 8 për aksin Fushë Labinot – Maqedoni i Veriut, ndërkohë që 4 segmentet e tjerë janë në fazë më të avancuar. Në 2 prej tyre tashmë kanë nisur punimet, ndërsa 2 të tjerët janë në fazë tenderimi për kryerjen e punimeve. Paralelisht është duke u projektuar bypassi i Elbasanit, që sipas afateve kontraktuale duhet të jetë gati në vitin 2024.

Ndëkaq, në fazë më pak të avancuar është segmenti nga Lekaj në Elbasan, që aktualisht është në fazë tenderimi për projektimin e tij.  Ky aks praktikisht do të “dublojë” bypassin e Rrogozhinës pritet të ketë një gjatësi prej rreth 40 km, teksa kompania projektuese do të duhet të planifikojë lidhjen e tij me bypassin e Elbasanit. Në kahun tjetër ai do të kryqëzohet me korridorin Adriatiko – Jonian.

Korridori VIII është konceptuar për të lehtësuar shkëmbimin e mallrave dhe pasagjerëve midis vendeve të BE-së, shteteve të Ballkanit që kanë dalje në Detin e Zi dhe Detin Kaspik dhe shteteve të Azisë Qendrore. Ai nis nga portet italiane të Barit dhe Brindizit, në portet e Durrësit e Vlorës dhe më pas vazhdon drejt Elbasanit, Shkupit dhe Sofjes, duke mbërritur deri në portet e Burgasit dhe Varnës në Detin e Zi.

AKSI RRUGOR ELBASAN – MAQEDONI E VERIUT

LOTI I – LIDHUR KONTRATA (2.9 MLD LEKË, ME TVSH)

LOTI II – LIDHUR KONTRATA (2.6 MLD LEKË, ME TVSH)

LOTI III – HAPUR TENDERI (FONDI LIMIT 2.5 MLD LEKË, PA TVSH)

LOTI IV – HAPUR TENDERI (FONDI LIMIT 2.5 MLD LEKË, PA TVSH)

BUSHTRICË – DOGANË – NË PROJEKTIM (49 MLN LEKË, PA TVSH)

Ola Mitre /SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.