BE, 39 mld USD hua për rimëkëmbjen e Ukrainës – Von der Leyen thekson mbështetjen e bllokut përballë sulmeve ruse

Kristi Ceta/SCAN

Komisioni Evropian do t’i japë Ukrainës një hua të re me vlerë deri në 39 miliardë dollarë, njoftoi presidentja e komisionit, Ursula von der Leyen gjatë, një vizite në Kiev. Ajo e cilësoi këtë hua si “një kontribut tjetër të madh të BE-së për rimëkëmbjen e Ukrainës”.

“Sulmet e pareshtura ruse nënkuptojnë se Ukraina ka nevojë për mbështetjen e vazhdueshme të BE-së”, shkroi ajo në rrjetin social X.

Duke folur në një konferencë për media me von der Leyen, presidenti i Ukrainës, Volodymyr Zelensky, tha se “plani për fitore” i vendit të tij në luftën kundër Rusisë varet nga vendimet e shpejta që aleatët duhet të marrin këtë vit. Zelensky tha se Ukraina synon t’i përdorë këto para për mbrojtjen ajrore, energjinë dhe për blerjen e armëve.

Fondi është pjesë e një plani të gjerë të grupit të shtatë shteteve më të industrializuara (G7) për ta mbështetur Kievin duke përdorur asetet e ngrira financiare të Rusisë me vlerë 300 miliardë dollarë. Këto asete u ngrinë në kuadër të sanksioneve kundër Moskës për pushtimin e Ukrainës.

Vizita e Von der Leyen në kryeqytetin ukrainas vjen një ditë pasi ajo njoftoi se BE-ja do t’ia japë Ukrainës edhe 178 milionë dollarë për të riparuar infrastrukturën e dëmtuar të energjisë, të zgjerojë energjinë e rinovueshme dhe të ndërtojë strehimore.

Në fillim të kësaj jave, Agjencia Ndërkombëtare e Energjisë (IEA) paralajmëroi se ky dimër mund të jetë më i vështiri për Ukrainën deri tani, sepse infrastruktura energjetike e saj ka hasur probleme si pasojë e sulmeve ruse ndaj termocentraleve dhe rrjetit energjetik.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.