“Blackout-i” energjetik, ENTSO -E nis hetim të thelluar – Organizata e OST-ve: Incident i madh, po marrim informacione nga vendet e prekura

Komiteti i Operacioneve të Sistemeve i ENTSO – E do të kryejë një hetim ndërkombëtar lidhur me incidentin në rrjetin elektrik, që solli ndërprerje disaorëshe të energjisë të premten e 21 qershorit 2024 në Shqipëri, Mal të Zi, Bosnje e Hercegovinë dhe pjesërisht në Kroaci.

ENTSO -E është një shoqatë evropiane me bazë në Bruksel dhe anëtarë të saj janë Operatorët e Sistemit të Transmetimit të vendeve evropiane. Në një deklaratë, kjo organizatë e konsideron një incident të madh ngjarjen e ndodhur, teksa shton se aktualisht është duke mbledhur të gjitha të dhënat teknike relevante nga OST-të e prekura dhe do të ofrojë më shumë informacion sa më shpejt të jetë e mundur.

“Në përputhje me metodologjinë e shkallës së klasifikimit të incidenteve, Komiteti i Operacioneve të Sistemeve i ENTSO-E do të kryejë një hetim të detajuar të kësaj ngjarjeje në javët në vijim, me mbështetjen e një paneli ekspertësh”, – thuhet nër të tjera një njoftim.

Një analizë më e detajuar mbi ngjarjen u njoftua edhe nga ministrja e Infrastrukturës dhe Energjisë, Belinda Balluku, teksa nga analiza paraprake rezulton se problemet teknike u krijuan nga volumet e mëdha të energjisë në sistemet e transmetimit, shoqëruar me temperaturat e larta në nivele rekord.

Në Shqipëri, teknikët e OST-së arritën të rekuperojnë të gjithë shpërndarjen e energjisë elektrike përmes linjave të transmetimit në rang vendi brenda 30 minutash, ndërkohë që Tirana u rikuperua në 17 minuta.

Ola Mitre/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.