Blerës misteriozë menaxhojnë flotën e “errët” të LNG – Kompani të regjistruara në Emiratet e Bashkuara Arabe blejnë cisterna

Dorina Kurtaj/ SCAN

Blerës misteriozë me lidhje me Rusinë po blejnë anije me gaz natyror të lëngshëm –  LNG, në një seri lëvizjesh që sugjerojnë se Moska po zgjeron ‘flotën e saj të errët’ të cisternave të energjisë. Individët e industrisë së transportit konfirmojnë se një grup kompanish të panjohura, kryesisht të regjistruara në Emiratet e Bashkuara Arabe, kanë blerë në mënyrë të vazhdueshme anije LNG gjatë vitit të kaluar, duke rritur çmimet e tregut, veçanërisht për anijet e vjetra.

Megjithëse shitjet ruse të LNG-së janë më pak të prekura nga sanksionet perëndimore sesa nafta, Moska duket se po përgatitet për kufizime më të forta. Që nga tremujori i dytë i vitit 2023, më shumë se 50 anije LNG u kanë “kaluar” kompanive të vendosura në Emiratet e Bashkuara Arabe, sipas Uinduard, një konsulencë rreziku për pronarët e anijeve dhe qeveritë.

Zhvillimet në tregun e cisternave LNG tregojnë për një rrjet kompleks biznesesh detare të lidhura me interesat ruse. Disa nga grupet me bazë në Dubai kanë struktura të paqarta pronësie të ngjashme me ato që operojnë flotën e errët të cisternave të naftës të Moskës.

Shumë nga anijet e sapomarra LNG tani po lundrojnë në rrugët e përdorura tradicionalisht për transportimin e gazit natyror nga Rusia. Gazi natyror i lëngshëm është më i rëndësishëm për ekonominë ruse të kohës së luftës, duke siguruar të ardhura të vlefshme, pas ndërprerjes së gazsjellësit në Europë për shkak të pushtimit të Ukrainës në 2022-shin.

BE dhe Azia, tregjet kryesore për LNG-në ruse, u përmbajtën nga vendosja e ndalimeve për të shmangur ndërprerjen e tregut global të gazit. Por Perëndimi ka filluar të marrë masa për të kufizuar tregtinë. Në qershor, BE miratoi kufizime që do të ndalonin shkarkimin e LNG-së ruse nga akullthyes të mëdhenj në anije më të vogla në portet e BE-së, duke kufizuar ndjeshëm opsionet e Rusisë. Përveç kësaj, projekti i madh rus i LNG-së, Arctic LNG 2, është gjithashtu nën sanksionet e SHBA-së, duke e bërë gjithnjë e më të vështirë transportin e mallrave.

Ekspertët thonë se “flota fantazmë” të tilla mund të lehtësojnë tregtinë e mallrave të sanksionuara, duke forcuar pozicionin e Rusisë në treg.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.