BRICS kontrollon mbi 20% të rezervave globale të arit – Të dhënat e fundit tregojnë rritjen e ndikimit të organizatës në tregun botëror

Kristi Ceta/SCAN

Më shumë se 20% e rezervave të arit në botë janë të përqendruara në vendet e BRICS, sipas të dhënave nga Këshilli Botëror i Arit. Pjesa më e madhe e rezervave të metalit të çmuar i përket Rusisë dhe Kinës. Këto të dhëna nënvizojnë fuqinë dhe ndikimin në rritje të këtyre ekonomive, që synojnë të lëkundin ekuilibrat botërorë.

Sipas rezultateve të tremujorit të dytë të vitit 2024, vëllimet totale globale të rezervave të arit arritën në 29.03 mijë tonë. Nga këto, 6.2 mijë tonë (21.4%) janë nën kontrollin e vendet të BRICS, duke përjashtuar Iranin dhe Etiopinë, të cilat nuk i zbuluan të dhënat e tyre.

Pjesa më e madhe e arit midis vendeve të shoqatës ruhet në Rusi, 2.34 mijë tonë. Kjo është 8.1% e të gjitha rezervave botërore dhe 37.6% e rezervave të BRICS. Kina ka pak më pak, rreth 2.26 mijë tonë ose 7.8% të rezervave botërore dhe 36.4% të totalit të organizatës.

Anëtarët e mbetur, si India, Arabia Saudite, Brazili, Egjipti, Afrika e Jugut dhe Emiratet e Bashkuara Arabe, kanë më pak se 3% të rezervave të arit në botë. Sipas rezultateve të tremujorit të dytë të këtij viti, rezervat e Indisë arritën në 840.76 tonë apo 13.5% të totalit në BRICS, ndërsa Arabia Saudite 323 tonë, duke grumbulluar 5.2% të organizatës.

Në të njëjtën kohë, SHBA është vendi me rezervat më të mëdha të arit në botë, me  8.1 mijë tonë, pothuajse një e treta e totalit botëror. Më pas vjen Gjermania me 3,35 mijë tonë (11,6% e totalit), Italia me 2,45 mijë tonë apo 8,5% dhe Franca me 2,44 mijë tonë (8,4%). Ndërsa Rusia mbyll pesëshen e parë të renditjes globale.

Samiti i BRICS në Kazan, pritet të japë detaje të mëtejshme mbi një monedhë të re brenda organizatës, që mund të përshpejtojë trendin e de-dollarizimit, pasi shumë vende po kërkojnë reduktimin e varësisë nga dollari amerikan. Monedha e re mund të ndikojë gjithashtu në çmimin e arit, pasi rritja e kërkesës nga bankat qendrore dhe investitorët mund të rrisë vlerën e tij.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.