Britania, mbi 21 mld paund për energjinë e pastër – Vendi planifikon të arrijë zero emetime karboni deri në 2050

Kristi Ceta/SCAN

 

Britania e Madhe do të sigurojë financim deri në 21.7 miliardë paund gjatë 25 viteve për të zhvilluar kapjen dhe ruajtjen e karbonit, si dhe teknologjinë e hidrogjenit në Anglinë veriore.

Vendi ka një objektiv klimatik për të arritur emetimet neto zero deri në vitin 2050 dhe ka thënë se sistemi i ruajtjes së karbonit do të nevojitet për të frenuar emetimet nga sektorët industrialë me energji intensive, si dhe për të krijuar vende pune.

“Kjo teknologji që ndryshon lojën do të sjellë 4000 vende pune dhe miliarda investime private në komunitetet në të gjithë Merseyside dhe Teesside, duke nxitur rritjen në këto qendra industriale dhe duke fuqizuar pjesën tjetër të vendit,” tha në një deklaratë Kancelarja e Thesarit Rachel Reeves.

Sistemi i ruajtjes përfshin kapjen e emetimeve nga termocentralet dhe industria për t’i lejuar ato të mbahen nën tokë, por ka qenë i ngadalshëm për t’u zhvilluar për shkak të kostos së lartë të projekteve.

Qeveria e mëparshme konservatore e Britanisë kishte premtuar 20 miliardë paund fonde për këtë sistem në vitin 2023, të cilat nuk u dhanë kurrë plotësisht.

Të dy impiantet në Anglinë veriore do të kenë një kapacitet të kombinuar vjetor të kapjes së karbonit prej 8.5 milionë tonë në vit, ekuivalente me heqjen e katër milionë makinave nga rrugët, tha qeveria.

Grupi HyNet North West në Merseyside kërkon të kapë emetimet nga impiantet industriale dhe t’i ruajë ato në fushat e varfëruara të gazit në Detin Irlandez. Ai po zhvillohet nga një konsorcium i drejtuar nga grupi italian i energjisë Eni.

Kompanitë kryesore të naftës dhe gazit Equinor dhe BP janë të përfshira në zhvillimin e një projekti në Teesside që do të ruante emetimet e kapura nën Detin e Veriut.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.