Ministri Gonxhja prezanton marrëveshjen e pensioneve me Italinë: “Hapa të rëndësishëm për rritjen e mundësive për qytetarët”

Ernilda Luzi/ Scan

 

Në mbledhjen e parë të Këshillit Kombëtar të Punës për vitin 2024, Ministri Gonxhja u shpreh në një postim në rrjetet sociale, se u trajtuan çështje të rëndësishme për tregun e punës, mbështetjen për të rinjtë dhe sfidat për sigurimet shoqërore.

Gjatë këtij takimi u diskuta për marrëveshjen e Sigurimeve Shoqërore me Italinë, ku u theksuan përfitimet që do të sjellë për qytetarët shqiptarë që punojnë në Itali dhe anasjelltas.

Gjithashtu u bë një prezantim i Skemës së Garancisë Rinore, e cila ka filluar të pilotohet dhe pritet të zbatohet deri në vitin 2027. Ky program synon të rrisë punësimin e të rinjve dhe t’i integrojë ata në tregun e punës, duke ofruar mundësi konkrete për zhvillim profesional.

Ndërkaq, u diskutua mbi Reformën e Sigurimeve Shoqërore, ku u theksua rëndësia e përmirësimit të skemave të pensioneve, për të garantuar një të ardhme më të sigurt për qytetarët shqiptarë.

Në këtë mbledhje u fol me detaje mbi Dokumentin politik për Sigurinë dhe Shëndetin në Punë (SSHP) 2024 – 2030. Kjo strategji synon të rrisë standardet e sigurisë dhe shëndetit në vendin e punës për të gjithë punëmarrësit.

Këto hapa janë të rëndësishëm për përmirësimin e kushteve të punës, rritjen e mundësive për të rinjtë dhe mbrojtjen sociale për të gjithë qytetarët, theksoi ministri Gonxhja.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.