Cili qark shpenzoi më shumë në vitin 2023? – Tirana kryeson renditjen. Korça e dyta në radhë, por e para për rritjen më të lartë

Xhorxhina Deda/SCAN

 

Sipas të dhënave të INSTAT, shpenzimet e familjeve në vitin 2023 u rritën me 3.7%, por struktura sipas grupeve nuk paraqet ndryshime thelbësore. Ushqimet zënë peshën më të madhe, pasuar nga shpenzimet për banesën, restorante e hotele dhe transporti.

Por si ndryshuan shpenzimet sipas qarqeve?

“Scan Intel”, referuar anketës së buxhetit të familjeve, ka analizuar shpërndarjen e shpenzimeve sipas 12-të qarqeve të vendit, ku në vitin 2023, qarku i Tiranës paraqet shpenzimet mesatare më të larta mujore për konsum.

Një familje shqiptare në qarkun e Tiranës shpenzon për konsum mesatarisht 108,098 lekë në muaj, ndjekur nga Korça me 91,034 lekë dhe Durrësi me 89,561 lekë në muaj. Qarqet me nivel më të ulët të shpenzimeve mesatare mujore për konsum janë qarku i Dibrës me 74,479 dhe i Kukësit me 73,225 lekë në muaj.

Referuar të dhënave rritjen më të lartë të shpenzimeve e ka shënaur qarku i Korçës me 6.6%, pasuar nga qarku i Elbasanit me 5.5% dhe ai i Vlorës me 5.4%. Ndërkohë, shpenzimet mesatare mujore në qarkun e Tiranës u rritën me 3.5%.

Qarqet që kanë regjistruar rritjen më të ulët të shpenzimeve janë Berati dhe Kukësi me nga 0.2% secili. Duket se kanë ndryshuar pozicionet e qarqeve sa i përket ndryshimit vjetor të shpenzimeve, pasi gjatë vitit të kaluar Berati regjistroi rritjen më të lartë, ndërsa Korça kishte rritjen më të ulët.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.