Çfarë i pengon produktet shqiptare të konkurrojnë në BE? – Sfidat kryesore janë certifikimi me markën CE dhe kostot e testimit të cilësisë

Ledina Elezi/SCAN

 

1 në 2 kompani ose 55% e tyre duan të investojnë në rritjen e cilësisë së produkteve që prodhojnë, me qëllim kryesor tregtimin e tyre në tregun e Bashkimit Evropian. Sipas një studimi të kryer nga Këshilli i Investimeve, vetëm 23% e bizneseve kanë deklaruar se investimet në këtë drejtim janë të papërballueshme, ndërsa pjesa tjetër janë të kënaqur me tregtinë brenda vendit ose me vendet jashtë BE-së.

Bizneset që ushtrojnë aktivitete të turizmit, të industrisë përpunuese dhe bujqësisë janë më të interesuarit për eksportim të produkteve në tregun e Bashkimit Evropian.

Por, ku qëndron problemi?

Certifikimi është një nga sfidat më të mëdha për kompanitë që operojnë në vend, por edhe për ato eksportuese. Kostoja e testimit të cilësisë së produkteve dhe mungesa e njohurive lidhur me certifikimin për markën CE janë disa nga vështirësitë me të cilat ndeshen bizneset. Rreth 4 në 5 kompani e gjykojnë të nevojshme ose shumë të nevojshme konsulencën profesionale për të arritur kërkesat e standardeve apo rregulloreve të BE-së.

Kompanitë gjykojnë se u mungon mbështetja institucionale nga dhomat, shoqatat e biznesit dhe institucionet shtetërore. Gati 38% e kompanive vlerësojnë mungesën e ndihmës financiare shtetërore në uljen e kostove të përvetësimit të standardeve, ndërsa 3 në 5 kompani perceptojnë se shteti nuk ofron masa për lehtësim të aksesit në certifikim. Për to, shteti ka ofruar mbështetje financiare vetëm në pajisje dhe teknologji për arritjen e standardeve evropiane.

Sipas bizneseve, duhet krijuar një portal i vetëm ku të ofrohet informacion mbi vendosjen e produkteve në tregun e brendshëm apo eksportimin e tyre drejt BE.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.