“Britania nuk duhet të ulë taksat para zgjedhjeve” – FMN udhëzon Bankën e Anglisë të ndryshojë normat e interesit

Fondi Monetar Ndërkombëtar (FMN) paralajmëroi qeverinë britanike se mund të humbë objektivin e saj të borxhit dhe nuk duhet të ulë taksat përpara zgjedhjeve të këtij viti, ndërsa rritja e tyre ka të ngjarë të jetë e nevojshme në të ardhmen.

FMN rriti projeksionin për rritjen ekonomike britanike në 2024 në 0.7% nga një parashikim i prillit prej 0.5%, një përmirësim që pasqyroi të dhëna të forta të rritjes së fillimit të vitit 2024 dhe do të mirëpritet nga kryeministri britanik Rishi Sunak i cili po përpiqet të fitojë më shumë vota.

Por raporti vjetor mbi ekonominë e Britanisë kritikoi gjithashtu politikat e qeverisë së Sunak, veçanërisht shkurtimet e fundit të taksave në formën e kontributeve më të ulëta të sigurimeve shoqërore.

FMN tha se Banka e Anglisë duhet të ulë normat e interesit dy ose ndoshta tri herë këtë vit, me një çerek pikë në çdo rast, megjithëse pritet që inflacioni të kthehet në objektivin e Bankës së Anglisë në një bazë të qëndrueshme në fillim të vitit 2025.

Ministri i Financave Jeremy Hunt u përqendrua në përmirësimin e perspektivës së menjëhershme ekonomike, duke thënë se FMN ishte dakord me komentet e tij të fundit se ekonomia e Mbretërisë së Bashkuar e ka kaluar pikën kritike. “Është koha për ta ‘shkundur’ pak pesimizmin e pajustifikuar në lidhje me perspektivat tona,” tha ai në një deklaratë.

Por Fondi tha se rritja do të mbetet e mbërthyer në një shpejtësi të ngadaltë dhe borxhi do të rritet. Ai parashikon që borxhi neto i sektorit publik, duke përjashtuar programin e blerjes së bonove të BoE-së, do të arrijë në 97% të PBB-së në vitin financiar 2028/29.

FMN theksoi se kishte më shumë shpenzime përpara sesa në parashikimet e Mbretërisë së Bashkuar dhe Britania duhej ‘të shtrëngojë rripin’ – nëpërmjet rritjes së taksave ose shkurtimeve të shpenzimeve – me një mesatare prej rreth 1 pikë përqindje të PBB-së, ose afërsisht 30 miliardë paund (38 miliardë dollarë) në vit, për të stabilizuar borxhin deri në fund të dekadës. Ai tha se do të kishte këshilluar kundër uljeve të normave të sigurimeve shoqërore të prezantuara tashmë nga qeveria duke pasur parasysh koston e tyre të rëndë prej rreth 0.5% të PBB-së.

Kristi Ceta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.