Ligji rregullator për AI merr “dritën jeshile” nga BE – Komisioni ka fuqinë për të gjobitur shkelësit me 35 mln euro

Shtetet anëtare të Bashkimit Evropian firmosën marrëveshjen përfundimtare për ligjin e parë të tillë në botë për rregullimin e inteligjencës artificiale, ndërkohë që institucionet në mbarë botën garojnë për t’i vënë frerë teknologjisë.

Këshilli i BE-së tha se kishte miratuar Aktin e AI, një pjesë novatore e ligjit rregullator që vendos rregulla gjithëpërfshirëse rreth teknologjisë së inteligjencës artificiale.

Akti i Inteligjencës Artificiale zbaton një qasje të bazuar në rrezik për ta, që do të thotë se aplikime të ndryshme të teknologjisë trajtohen ndryshe, në varësi të kërcënimeve të perceptuara që ato paraqesin për shoqërinë.

Ligji ndalon aplikimet e AI që konsiderohen “të papranueshme” për sa i përket nivelit të tyre të rrezikut. Aplikacione të tilla përmbajnë të ashtuquajturat sisteme të “vlerësimit social” që i rendit qytetarët bazuar në grumbullimin dhe analizën e të dhënave të tyre, policimin parashikues dhe njohjen emocionale në vendin e punës dhe në shkolla.

Sistemet e Inteligjencës Artificiale me rrezik të lartë përfshijnë pajisje mjekësore, të cilat vlerësohen në bazë të rreziqeve që ato paraqesin për shëndetin, sigurinë dhe të drejtat themelore të qytetarëve. Ato përfshijnë gjithashtu aplikime të AI në shërbimet financiare dhe arsimin, ku ekziston rreziku i paragjykimeve të ngulitura në algoritmet e AI.

Komisioni i BE-së do të ketë fuqinë për të gjobitur kompanitë që shkelin ligjin e AI deri në 35 milionë euro ose 7% të të ardhurave të tyre vjetore globale, cilado qoftë më e lartë.

Ndryshimi në ligjin e BE-së vjen pas lançimit të ChatGPT nga OpenAI në nëntor të vitit 2022. Zyrtarët e kuptuan në atë kohë se legjislacionit ekzistues i mungonin detajet e nevojshme për të adresuar aftësitë e avancuara të teknologjisë gjeneruese të inteligjencës artificiale në zhvillim dhe rreziqet rreth përdorimit të materialit me të drejtë autori.

Ligji vendos kufizime të ashpra për sistemet gjeneruese të AI.  Këto përfshijnë kërkesat për respektimin e ligjit të BE-së për të drejtat e autorit, zbulimet e transparencës se si janë trajnuar modelet, testimin rutinë dhe mbrojtjen e duhur të sigurisë kibernetike.

Adelina Onuzi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.