Barra e tatimit, bizneset po rrisin çmimet e shërbimeve – Tabaku, në Gjykatën Kushtetuese: Në 4 muaj janë mbyllur 3600 subjekte

Partia Demokratike ka depozituar në Gjykatën Kushtetuese argumentet që mbështesin padinë mbi ligjin e taksimit të profesionistëve të lirë. Deputetja Demokrate, Jorida Tabaku ka theksuar se ky regjim tatimor po sjell pasoja të rënda mbi bizneset duke i detyruar të mbyllen apo transferohen dhe nga ana tjetër ka prodhuar rritje të ndjeshme të shërbimeve për qytetarët.

“Deri në muajin prill të këtij viti janë pezulluar 3600 biznese. Nuk ndjejmë kënaqësi e që e paralajmëruam që bizneset do të mbyllen, një pjesë e tyre janë duke u larguar. Do ta vijojmë këtë betejë, sot ndodhemi në kushtet e cenimit të sigurisë juridike dhe të një tatimi që shkon në 30-40 %.  Kjo taksë prek një zinxhir shërbimesh sepse ka një rritje çmimesh që ndikon drejtpërdrejt tek konsumatorët. Shpresoj që gjykata Kushtetuese të mbrojë interesin publik.”

Tabaku ka komentuar edhe deklaratën e FMN e cila ka mbrojtur këtë taksim, duke theksuar se Fondi Monetar Ndërkombëtar i referohet përjashtimeve të shumta tatimore që zbatohen aktualisht.

“FMN e ka pasur me faktin se sot ka shumë përjashtime. Ne nuk po kërkojmë një politikë tatimore selektive, por të trajtohen të gjitha bizneset e tjera sipas xhiros. Në këtë rast qeveria duhet të korrigjojë përjashtimet të tjera nga taksat.

Pas disa padive të depozituara në Gjykatën Kushtetuese mbi regjimin e ri tatimor për profesionistët e lirë, ky institucion ka vendosur të zhvillojë seancën e parë më datën 18 Qershor.

Elisabeta Dosku/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.