Tregu Postar, në ditë të vështira! – Bien me 17% dërgesat brenda vendit, ndërsa rriten ato me jashtë

Numri i subjekteve që operojnë në tregun postar dhe i objekteve të dërguara prej tyre ka pësuar një ulje të ndjeshme gjatë vitit të shkuar.

Konkretisht, në periudhën nga viti 2020 deri në 2022-in ka pasur një rritje të lartë në numrin e ofruesve të shërbimeve postare. Nga 18 subjekte që operonin në këtë treg në vitin 2020, dy vite më vonë ky numër arriti në 36. Megjithatë, në fund të vitit 2023 në sektorin postar operonin vetëm 24 subjekte dhe Posta Shqiptare vazhdon të mbetet ofruesi i vetëm i shërbimit universal për letra, paketa të vogla, karta postare, cekograme, ftesa, komunikime apo lajmërime gjyqësore.

Rreth 12 subjekte kanë kërkuar vetë çregjistrim ose në përfundim të inspektimeve ka rezultuar që nuk kanë përmbushur kushtet për ofrimin e shërbimeve postare sipas ligjit.

Sipas të dhënave nga AKEP, numri total i objekteve postare të pranuara gjatë vitit 2023 nga Posta Shqiptare dhe ofruesit e tjerë të shërbimeve postare ishte rreth 23 milionë, një rënie me 15% krahasuar me vitin 2021. Ndërkohë që numri i objekteve të shërbimit universal ishte rreth 18.4 milionë, duke u reduktuar me 16% krahasuar me vitin paraardhës.

Rënia e ndjeshme e numrit të objekteve postare të shërbimit universal ka ardhur kryesisht për shkak të rënies me 17% të numrit të objekteve brenda vendit, të cilat përbëjnë 96% të totalit. Objektet postare ndërkombëtare rezultuan me rritje me 2% në vitin 2023, ku objektet postare hyrëse u rritën me 4%, ndërsa numri i objekteve postare dalëse u reduktua me 6%.

Në lidhje me kohën e shpërndarjes së objekteve postare brenda vendit, 97% e dërgesave postare në zonat urbane janë shpërndarë një ditë pas pranimit, ndërsa 85% e dërgesave postare me destinacion zonat rurale janë dorëzuar në dy ditë pas pranimit.

Sipërmarrësit e shërbimeve postare kanë siguruar 2.3 miliardë lekë të ardhura gjatë vitit të shkuar, rënie me 10% krahasuar me periudhën pararendëse. Kjo erdhi si pasojë e numrit më të vogël të subjekteve dhe bilancit negativ në të ardhurat e Postës Shqiptare, e cila dominon tregun sa i takon volumit të dërgesave dhe shpërndarjeve postare, ndjekur më pas nga Albanian Daily Express dhe United Transport.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.