Google investon 1 miliard euro në Finlandë – Për nxitjen e Inteligjencës Artificiale me energji të pastër

Google do të investojë edhe 1 miliard euro për zgjerimin e kampusit të qendrës së të dhënave në Finlandë me qëllim rritjen e biznesit të inteligjencës artificiale (AI) në Evropë.

Vitet e fundit, janë vendosur shumë qendra të dhënash në vendet nordike për shkak të klimës më të freskët të rajonit, uljes së taksave dhe disponueshmërisë së bollshme të energjisë së rinovueshme.

Fqinjët nordikë të Finlandës, Suedia dhe Norvegjia kohët e fundit janë bërë gjithnjë e më kritikë për pritjen e tyre, me disa ekspertë të industrisë që argumentojnë se këto vende duhet të përdorin energjinë e tyre të rinovueshme për produkte të tilla si çeliku i gjelbër.

Por, kapaciteti i energjisë së erës në Finlandë është rritur kaq shpejt vitet e fundit, me 75% në 5,677 megavat vetëm në vitin 2022, sa që në ditët me erë çmimet kanë rënë në negative, treguan statistikat e industrisë.

Prandaj ka ende kapacitet të rinovueshëm në dispozicion për qendrat e të dhënave si ajo e Google, e cila tregton energjinë e erës në Finlandë sipas kontratave afatgjata.

Analistët besojnë se konsumi i energjisë i qendrave të të dhënave do të rritet masivisht për shkak të rritjes së shpejtë të përdorimit të Inteligjencës Artificiale, të cilën Google, gjithashtu, e citoi për një nga arsyet pas vendimit të këtij investimi, së bashku me qendrën e saj të të dhënave Hamina në Finlandë që tashmë funksionon me 97% energji të pastër.

“Nxehtësia që del nga qendra jonë finlandeze e të dhënave do të ridrejtohet në rrjetin e ngrohjes qendrore në Hamina aty pranë, duke mbuluar familjet lokale, shkollat ​​dhe ndërtesat e shërbimeve publike”, tha Google në deklaratë. Ai shtoi se synonte të arrinte emetime neto zero në të gjitha operacionet e tij dhe zinxhirin e vlerës deri në vitin 2030.

Përveç investimit të tij finlandez, gjigandi i kërkimit dhe cloud njoftoi muajin e kaluar se do të ndërtonte qendra të reja të dhënash në Holandë dhe Belgjikë.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.