Britania teston dronët për dërgesat – Synohet që ky shërbim të bëhet pjesë e përditshmërisë
Kristi Ceta/SCAN
Rregullatori i aviacionit në Britani ka përzgjedhur gjashtë projekte, duke përfshirë një nga gjiganti i tregtisë elektronike Amazon, për të testuar përdorimin e dronëve në dërgesat, inspektimin e infrastrukturës dhe shërbimet e urgjencës.
Autoriteti i Aviacionit Civil të Mbretërisë së Bashkuar kishte paralajmëruar në fillim të këtij viti se donte të lejonte më shumë drone që fluturonin për përdorime të tilla.
Aktualisht përdoruesit e dronëve në Britani lejohen të fluturojnë vetëm përtej vijës vizuale të shikimit, si pjesë e provave me kufizime të rrepta.
Projektet e përzgjedhura do të jenë në gjendje të fluturojnë dronët e tyre në distanca përtej aftësisë së fluturuesit për t’i parë ato, duke përdorur teknologji të avancuara për navigim dhe kontroll.
Ndër këto projekte përfshihet shërbimi i shpërndarjes së dronëve të Amazon, i quajtur Prime Air, Airspection për të kryer inspektime të fermave me erë në det të hapur dhe Project Lifeline, i cili synon të ofrojë furnizime mjekësore.
Autoriteti tha se testi do të ndihmonte përpjekjet e vazhdueshme të rregullatorit për të zhvilluar politika dhe rregullore në mënyrë që fluturimet me drone të mund të “integrohen plotësisht” me përdoruesit e tjerë të hapësirës ajrore.
Drejtoresha e Autoritetit të Aviacionit Civil, u shpreh se qëllimi është që operacionet me dron përtej kufirit vizual të shikimit të bëhen një realitet i sigurt dhe i përditshëm.
Amazon tha në tetor të vitit të kaluar se po planifikonte dërgimin e paketave përmes dronëve në Britani, Itali dhe në një vendndodhje të tretë në Shtetet e Bashkuara.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.