BSH, nis ndërgjegjësimin për edukimin financiar, Tanku: “MONEY SMART’’, kultura financiare është çelës suksesi
![](https://scantv.al/wp-content/uploads/2024/06/money-smart--764x383.jpg)
Brenda një peizazhi financiar në zhvillim të shpejtë, ku qasja në shërbimet financiare bëhet më e lehtë, ndërkohë që konsumatorët përballen me rreziqe të reja, kultura financiare është kthyer në një aftësi kyçe jetësore për individët. Për këtë, Banka e Shqipërisë dhe Banka Botërore, kanë prezantuar Ekspozitën edukative “MONEY SMART – Edukim financiar për të gjithë”. Altin Tanku, Drejtor i Departamentit të Kërkimeve në Bankën e Shqipërisë, ka thënë për SCAN TV se edukimi financiar ndihmon në kultivimin e kulturës dhe përfshirjes përmes rritjes së njohurive, aftësive dhe qëndrimeve financiare, duke synuar rritjen e mirëqenies dhe fuqizimin financiar të konsumatorëve.
“Edukimi financiar është i rëndësishëm edhe jashtë digjitalizimit, po veçanërisht në kohën ku po jetojmë. Më zhvillimet e fundit demografike që kemi dhe me shpejtësinë e madhe që ka digjitalizmi dhe ajo që e quajmë financiarizimi i jetës ekonomike të familjes, bizneseve dhe gjithë tregut, merr një rëndësi të jashtëzakonshme”- ka thënë Tanku
Gjithashtu, Drejtori i Departamentit të Kërkimeve në Bankën e Shqipërisë ka folur edhe për përfitimet e SEPA.
“SEPA është pjesë e asaj që ne e quajmë përmirësim i jetës ekonomike e financiare të familjeve shqiptare, ul në mënyrë të dukshme kostot dhe kohën e transaksioneve me vendet e Eurozonës ku ne kemi dhe pjesën dërmuese të aktvitetit tregtar-fainanciar, por dhe të familjeve e miqve që jetojnë në ato vende. Është një sukses i jashtëzakonshëm, me përfitim shumë të madh për ekonominë shqiptare”- shton drejtori i Departamentit të Kërkimit në BSH.
Ekspozita përpara selisë qendrore nr. 2 të Bankës së Shqipërisë do të jetë e hapur deri në datën 28 qershor. Në të ka informacion me fokus konsumatorin mbi çështje financiare.
Alida Lula/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.