Cilat janë shtetet ku pushojnë më shumë shqiptarët? – Kamberi: Kanë filluar të rezervojnë nga Zanzibar dhe Tailandë përtej sezonit veror

INSTAT raportoi se agjencitë turistike kanë shënuar rekord shitjesh për tre muajt e parë të këtij viti. Por, ku rezervojnë më shumë shqiptarët dhe se cilat janë shtetet më të preferuara?

Migena Kamberi, Eksperte Turizmi:

“Thuhet që këtë vit do të jetë një vit bombë le ta quajmë, dhe shqiptarët kanë preferuar më shumë te rezervojnë më shumë në zonat bregdetare në disa vende të ndryshme. Ka kryesuar Turqia dhe Egjipti, por nuk mund të lëmë pas Italinë dhe Spanjën. Kemi filluar të kemi prenotime të shumta se kuptohet që Turqia dhe Egjipti është gjithmonë në krye të listës.”

Ndërkohë jashtë sezonit veror, sipas ekspertes Kamberi shqiptarët po shkojnë përtej Europës.

“Nëse flasim jashtë sezonit, është që shqiptarët kanë filluar të rezervojnë në Zanzibar, në Tailandë, kanë filluar të zhvillojnë më shumë horizontin për të parë dhe kultura të reja.

Në të dhënat e INSTAT, raportohet se rezervimet në hotele janë rritur me 5.7%. Sipas kreut të shoqatës së Tur-operatorëve, janë shifra normale në raport me numrin e turistëve.

Besnik Vathi, Kryetari i Shoqatës së Tur-operatorëve:

“Është normale ne nuk duhet të çuditeshim edhe sikur të ishte 15-20%, por  kjo rritje rreth 5% ndoshta i afrohet më shumë realitetit.

Por çfarë kërkohet më shumë nga turistët përsa i përket qëndrimit?

“Kërkohen edhe apartamente me qira, kërkohen edhe hotele. Në plazhe janë kryesisht hoteleve të plazheve, që ofrojnë shërbime të ndryshme.”

Diamila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.