ERE, 42.5 mln lekë më shumë nga pagesat rregullatore – Enti synon mbledhjen e 368.9 mln lekëve nga 368 kompani të licencuara  

Enti Rregullator i Energjisë parashikon rritje të të ardhurave nga pagesat rregullatore të kompanive që operojnë në tregun e energjisë. Në total, ky dikaster synon të mbledhë rreth 368.9 milionë lekë për vitin 2024 nga subjektet e licencuar në sektorin e energjisë elektrike dhe gazit natyror.

Ndërkohë që, në raport me një vit më parë janë 42.5 mln lekë të ardhura shtesë. Kjo rritje mund të vijë si pasojë e numrit të shtuar të kompanive të licencuara në aktivitetet që lidhen me sektorin energjetik, duke qenë se sivjet detyrimin për të paguar e kanë 368 kompani, nga 341 të licencuar që rezultonin një vit më parë.

Tarifat për secilin subjekt janë përcaktuar përmes një vendimi të miratuar pak ditë më pare nga Enti Rregullator, që specifikon se pagesa duhet të jetë në përpjestim të drejtë më të ardhurat vjetore që vijnë nga veprimtaria e licencuar.

Tarifat llogariten në bazë të peshës specifike që zënë të ardhurat e realizuara në vitin paraardhës nga aktitviteti i çdo të licencuari ndaj totalit të të ardhurave të sektorit të energjisë elektrike dhe sektorit të gazit natyror.

Ndërkaq, ky është viti i pestë, ku aplikohen pagesa rregullatore fikse prej 100 mijë lekësh për shoqëritë e licencuara në aktivitetin e prodhimit të energjisë elektrike, furnizimit dhe tregtimit të energjisë elektrike dhe gazit natyror që në vitin parardhës nuk kanë pasur aktivitet.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.