Fermerët gjermanë prezantojnë “e-traktorin” – Automjeti inovativ shfrytëzon energjinë diellore për të furnizuar bateritë

Kristi Ceta/SCAN

 

Fermerët gjermanë kanë prezantuar një traktor që furnizohet nga një bateri elektrike dhe jo me naftë, diçka e rrallë në bujqësi. Në një përpjekje për të ulur ndjeshëm kostot e funksionimit, Thaddaeus dhe Johanna Baier kanë zhvilluar ‘Tadus’, një traktor me bateri që aktualisht po testohet në një fermë në Bavari.

“Për mendimin tim, avantazhet i tejkalojnë disavantazhet. Së pari, kursimet e kostos, sepse nuk kemi më nevojë të blejmë naftë dhe ne mund të prodhojmë energjinë elektrike që na nevojitet vetë me sistemet tona fotovoltaike,” thotë një fermer që po e përdor prototipin e ‘Tadus’, i cili ende nuk është i disponueshëm për t’u blerë, në fermën e tij.

Nëse gjithçka shkon siç e parashikon çifti themelues, e-traktori duhet të hyjë në prodhim serial në numër të vogël deri në fund të 2025-ës. Zhvilluesit Thaddaeus Baier i erdhi ideja kur pa shumë sisteme fotovoltaike në çatitë e fermave të ndryshme. E-traktori pritet të jetë më miqësor ndaj mjedisit, por edhe më efikas ekonomikisht.

Kostot e blerjes janë më të shtrenjta, sipas Johanna Baier, e cila është përgjegjëse për marketingun dhe zhvillimin e ‘Tadus’. Nga perspektiva e menaxhimit të biznesit, e-traktori do të jetë rreth 35 përqind më i shtrenjtë se një traktor i krahasueshëm me naftë, i cili kushton rreth 200,000 euro. Llogaritja e çmimit për e-traktorin tashmë përfshin subvencione nga një program i qeverisë federale.

“Megjithatë, është e rëndësishme të theksohet se shpenzimet e funksionimit të traktorit tonë janë aq të ulëta sa që këto kosto shtesë rimbursohen brenda 2000 deri në 3000 orëve operimi,” thekson ajo.

Në varësi të punës, traktori elektrik mund të përdoret për pesë deri në dhjetë orë me një karikim të vetëm. Megjithatë, traktori nuk është i përshtatshëm për punë shumë intensive me makineri të rënda, siç është plugimi. Në varësi të kapacitetit të stacionit, karikimi i baterisë mund të zgjasë deri në tetë orë. Por, në rast pune urgjente, bateria mund të hiqet dhe të zëvendësohet me një tjetër.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.