Financat palestineze, në rënie të lirë – Konflikti ka shkaktuar një tkurrje prej 86% në ekonominë e Gazës

Kristi Ceta/SCAN

 

Ndërsa forcat izraelite rrafshojnë Rripin e Gazës dhe Libanin jugor, populli palestinez në Gaza dhe Bregun Perëndimor po përjeton një kolaps të rëndë ekonomik, sipas një raporti nga Banka Botërore.

Në veçanti, Banka Botërore po i kërkon Izraelit të anulojë vendimet e fundit të njëanshme për të ndaluar të ardhurat doganore të Autoritetit Palestinez, për të siguruar që ky i fundit të mund të përmbushë detyrimet jetike fiskale, si pagat, pensionet dhe shërbimet sociale. Këto janë të ardhurat palestineze nga mallrat e importuara, të cilat Tel Avivi po i sekuestron duke intensifikuar mbytjen ekonomike të territoreve të pushtuara.

Shifrat zyrtare në raport tregojnë një rënie prej 35% të Prodhimit të Brendshëm Bruto në tremujorin e parë të 2024 për territoret palestineze në tërësi, duke shënuar tkurrjen më të madhe ekonomike të regjistruar ndonjëherë. Konflikti e ka sjellë ekonominë e Gazës në prag të kolapsit total, me një tkurrje marramendëse prej 86% në tremujorin e parë të 2024.

Në të njëjtën kohë, ekonomia e Bregut Perëndimor u tkurr me 25% në tremujorin e parë të 2024, me sektorët e tregtisë, shërbimeve, ndërtimit dhe prodhimit që shfaqin rëniet më të ndjeshme.

Ndikimi njerëzor ishte shkatërrues: rreth 40,000 njerëz vdiqën dhe 30,000 u plagosën rëndë. Armiqësitë e vazhdueshme dhe mbyllja kanë penguar furnizimet thelbësore të hyjnë në Rripin e Gazës.

Hendeku i financimit të Autoritetit Palestinez parashikohet të arrijë në 1.86 miliardë dollarë në vitin 2024, më shumë se dyfishi i deficitit të vitit 2023, gjë që mund të krijojë rreziqe në rritje të dështimit sistemik. Shqetësues është fakti që ky hendek vijon të mbulohet kryesisht nga huamarrja prej bankave vendase dhe detyrimet e prapambetura ndaj sektorit privat, nëpunësve civilë dhe fondit të pensioneve.

Papunësia ka arritur nivele të larta rekord si në Bregun Perëndimor ashtu edhe në Gaza. Për shkak të humbjeve të vendeve të punës dhe zvogëlimit të orarit, 87.2% e punëtorëve të Bregut Perëndimor panë tkurrjen e të ardhurave të familjeve të tyre. Gjithashtu, kostoja e mallrave bazë është rritur me afërsisht 250 për qind.

Rreth 1/3 e popullsisë jeton në varfëri ekstreme, duke vuajtur mungesa të mëdha ushqimore dhe si pasojë shkallë më të lartë të vdekjeve.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.