Roboti ndërton banesa pa çimento – Metoda inovative redukton përdorimin e karbonit dhe rrit efikasitetin
Kristi Ceta/SCAN
Një mënyrë e re për të ndërtuar një shtëpi të tërë duke përdorur materiale të lira, të bollshme, të qëndrueshme, pa çimento, mund të ndihmojë të gjithë industrinë të reduktojë përdorimin e karbonit, sipas Institutit Federal Zviceran të Teknologjisë.
Ekipi në Institutin e Zyrihut ka zhvilluar një robot që mund të printojë 3D një mur duke përdorur një përzierje të materialit ndërtimor. Kjo metodë krijon mure pa nevojën për kallëp, që normalisht do të mbante betonin në formë ndërsa ai thahej.
“Ne në thelb po e gjuajmë materialin me një shpejtësi të lartë dhe e ngjeshim atë në shtresat e mëparshme me anë të goditjes,” tha Dr Lauren Vasey, një inxhiniere dhe arkitekte që tani studion robotikën e ndërtimit.
Teknika përdor një qasje unike për printimin 3D, në të cilin një robot gjuan tufat e materialit ndërtimor me një shpejtësi prej 10 metrash në sekondë, duke i lidhur ato me njëra-tjetrën dhe duke formuar gradualisht një mur. Procesi ndryshon nga printimi tradicional 3D sepse nuk ka nevojë për të pritur që shtresa e mëparshme të thahet përpara se të aplikohet tjetra, duke lejuar një ndërtim më efikas.
Projekti është krijuar për t’i bërë materialet e qëndrueshme të ndërtimit më konkurruese në kosto dhe përdor një përzierje me bazë toke, e cila përfshin mbetjet e sheshit të ndërtimit dhe një sasi minimale aditivësh si llumi dhe balta.
“Rezultati më i madh nga ndërtimi në fakt është ky material i gërmuar. Pra, kur bëni një projekt të ri ndërtimi, ndalesa e parë që bëni është gërmimi i vendit. Dhe kështu ne duam të përfitojmë nga përdorimi i materialeve natyrore lokale si materiale ndërtimi,” tha Vasey.
Printeri është montuar në platforma të ndryshme, duke përfshirë një ekskavator me këmbë autonome, i zhvilluar nga Laboratori i Sistemeve Robotike në Institutin e Zyrihut, dhe deri më tani është përdorur për të ndërtuar me sukses struktura të larta deri në 3 metra.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.