Fituesit e Nobel në ekonomi – Çmimi iu dha tre studiuesve të “prosperitetit në institucionet shoqërore”

Kristi Ceta/SCAN

 

Ekonomistët Daron Acemoglu, Simon Johnson dhe James Robinson u nderuan të hënën me çmimin Nobel në shkencat ekonomike për punën që demonstron “rëndësinë e institucioneve shoqërore për prosperitetin e një vendi”.

Akademikët kanë ndihmuar të tregohet pse shoqëritë me “sundim të dobët të ligjit dhe institucione që shfrytëzojnë popullsinë nuk gjenerojnë rritje apo ndryshim për mirë,” tha komiteti Nobel.

Acemoglu dhe Johnson janë profesorë në Institutin e Teknologjisë në Massachusetts, ndërsa Robinson është drejtor i Institutit Pearson të Universitetit të Çikagos për Studimin dhe Zgjidhjen e Konflikteve Globale. Fituesit e çmimit, që quhet zyrtarisht “Çmimi Sveriges Riksbank në Shkencat Ekonomike në kujtim të Alfred Nobelit”, do të marrin 1.058 milionë dollarë nga Banka Qendrore Suedeze.

Paratë e çmimit do të ndahen në mënyrë të barabartë midis fituesve. Ekonomistja dhe historiania Claudia Goldin fitoi Nobelin e Ekonomisë në 2023 për avancimin e të kuptuarit të të ardhurave të grave dhe rezultateve të tregut të punës.

Çmimi Nobel për Paqen për vitin 2024 iu dha javën e kaluar organizatës japoneze të të mbijetuarve nga bomba atomike Nihon Hidankyo, në njohje të përpjekjeve të saj për të çliruar botën nga armët bërthamore. Kategoritw e tjera Nobel, të cilat u dhanë për herë të parë në 1901, janë në Fizikë, Kimi, Fiziologji apo Mjekësi dhe Letërsi.

Çmimi i shkencave ekonomike u prezantua në vitin 1968 për nder të 300-vjetorit të Bankës Qendrore Suedeze dhe u dha për herë të parë një vit më vonë. Fituesi zgjidhet nga Akademia Mbretërore Suedeze e Shkencave në njohje të punës me “rëndësi të jashtëzakonshme”.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.