Gjoba nga 1 milionë lekë, deri në heqje licence – Nuk mund të dypunësohen mjekët e spitaleve me statusin e autonomisë

Diamila Leka/ Scan

 

Në Fletoren Zyrtare janë botuar ndryshimet në “Urdhrin e Mjekëve”, të cilat kanë për qëllim rregullimin dhe menaxhimin e duhur të orareve të punës për të gjithë ata mjekë që duan të punojnë dhe në spitale publike e jopublike. Gjithashtu masa e penaliteteve është rritur për të ndëshkuar paligjshmëritë.

Masat disiplinore nisin nga vërejtja, në pezullimin e shërbimeve mjekësore për një periudhë kohe nga 6 muaj deri në 3 vjet, pezullimi i licensës për një periudhë kohore nga 6 muaj deri në 5 vjet, gjobë me vlerë nga 100 mijë lekë deri në 1 milionë lekë.

Ndërkohë penaliteti më i rëndë i cili është përcaktuar në ndryshimet e reja të Urdhrit të Mjekut është heqja e licenës për ushtrimin e profesionit të mjekut.

Për të gjithë ata mjekë të cilët janë anëtarë të Urdhrit të Mjekëve që kërkon të ushtrojë profesionin e mjekut në një institucion shëndetësor jo publik duhet t’i bëjë kërkesë titullarit të institucionit shëndetësor ku ai është i punësuar.

Sipas ndryshimeve, një mjek të mos punojë në sistemin shëndetësor jo publik më shumë se 30% të orëve mujore që punon në sistemin shëndetësor publik.

Dhe pika “d” që i shtohet nenit 8, thuhet se mjeku të mos u kërkojë pacientëve që i janë paraqitur në institucionin shëndetësor publik për trajtim dhe shërbime, në përputhje me specialitetin e tij, që t’i drejtohen institucionit shëndetësor jopublik, ku ai ushtron profesionin e tij.

Por cila është ajo kategori e mjekëve të cilët nuk mund të punësohen në spitale private?

Sipas Urdhrit të ri të Mjekëve, nuk mund të punojnë në spitale jopublike mjekët të cilët janë të punësuar në spitalet që kanë përfituar statusin e autonomisë spitalore. Karta e Autonomisë Menaxheriale Spitalore u është dhënë spitalit Memorial të Fierit, Qëndrës Spitalore Universitare “Nënë Tereza”, Spitaleve rajonale Durrës, Vlorë, Lezhë dhe Shkodër.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.