Google shqyrton përdorimin e energjisë bërthamore – Investimet për inteligjencën artificiale sjellin nevojën për burime të reja

Kristi Ceta/SCAN

 

Sipas CEO-s së Google, Sundar Pichai, energjia bërthamore një ditë mund të furnizojë disa nga qendrat e të dhënave të inteligjencës artificiale të kompanisë.

Google, tha Pichai, po kërkon burime energjie që jo vetëm plotësojnë nevojat e larta për energji, por që gjithashtu përmbushin qëllimin për të reduktuar emetimet e karbonit. Gjiganti i kërkimit synon të arrijë emetime neto zero në të gjitha operacionet e veta deri në vitin 2030.

“Ishte një objektiv shumë ambicioz dhe ne ende do të punojmë me shumë dëshirë drejt tij. Natyrisht, trajektorja e investimeve për inteligjencën artificiale ka shtuar shkallën e vështirësisë,” tha Pichai.

“Tani po shikojmë për investime shtesë, qofshin ato diellore, dhe vlerësimin e teknologjive si reaktorët e vegjël modularë bërthamorë, etj.,” shtoi ai, megjithëse nuk specifikoi se kur dhe ku kompania do të fillojë të sigurojë energji elektrike nga termocentralet bërthamore.

Kjo nuk është hera e parë që Google ka shprehur interes për alternativat e energjisë së pastër si energjia bërthamore. Në shtator 2023, ndërmarrja publikoi një postim në blog me një letër të bardhë, duke thënë se do të “vazhdonte të investonte ndjeshëm” në teknologjitë e energjisë së pastër si energjia gjeotermike dhe hidrogjeni.

Google nuk është i vetmi gjigant teknologjik që mendon të përdorë energjinë bërthamore për të fuqizuar qendrat e të dhënave. Të dy konkurrentët e tij, Amazon dhe Microsoft, kanë shpallur tashmë marrëveshje të energjisë elektrike me termocentralet bërthamore.

Në mars, Amazon nënshkroi një marrëveshje prej 650 milionë dollarësh për të blerë energji elektrike nga stacioni i energjisë bërthamore Susquehanna, sipas Financial Times. Më pas, në shtator, Microsoft firmosi një marrëveshje 20-vjeçare për të blerë energji nga centrali bërthamor Three Mile Island i Pensilvanisë. Reaktori, i cili u mbyll në vitin 2019, është planifikuar të rifillojë në vitin 2028.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.