Hapet gara për portin e ri në Porto Romano – Në mars 2025 nënshkruhet kontrata. Rreth 391 mln euro fondi limit për ndërtimin

Ledina Elezi/SCAN

 

Hapet gara ndërkombëtare për ndërtimin e portit të ri tregtar në Porto Romano me një fond limit prej 391 milionë euro. Ky port nuk do t’i shërbejë vetëm Shqipërisë, por edhe Kosovës dhe Maqedonisë së Veriut, pasi do të lidhet përmes hekurudhës me dy porte të thata në Prishtinë dhe Strugë.

Porti do të ketë një kontribut të madh në Prodhimin e Brendshëm Bruto dhe sigurinë e vendit, pasi bashkë më të do të ndërtohet edhe një bazë ushtarake e NATO-s, u shpreh kryeministri Edi Rama.

“Një port impakton deri në 3% të Prodhimit të Brendshëm Bruto. Ky i këtushmi do të jetë jo vetëm një port që do të impaktojë Prodhimin e Brendshëm Kombëtar, por do të jetë një port që do të impaktojë sigurinë tonë, sepse do të ketë edhe krahun e vet ushtarak, duke i ofruar NATO-s një bazë të re ushtarake.”

Belinda Balluku, Zëvendëskryeministre, njëherësh Ministre e Infrastrukturës dhe Energjisë, theksoi se do të ndërtohet një port dyfish më i thellë se ai i portit aktual të Durrësit.

“Duam të ndërtojmë një port dyfish më të thellë se ai që kemi sot në qytetin e Durrësit. Duam të ndërtojmë një terminal kontenierësh trefish më të madh, të gjelbër dhe të automatizuar. Duam të ndërtojmë sipërfaqe të dedikuara për entet ligjzbatuese, të cilat duhet të operojnë në territorin portual të Porto Romanos në komoditet të plotë për të përmbushur detyrat e tyre. Duam të ndërtojmë një zonë logjistike për të tërhequr investitorë të huaj në zemrën e aktivitetit tonë ekonomik dhe industrial.”

Royal HaskoningDHV do të jetë kompania e cila do të mbikëqyrë të gjithë procesin, që nga gara e deri të punimet për ndërtimet e portit. Përfaqësuesi i kësaj kompanie, Erik Smichdt, shpjegoi detajet teknike të projektit.

“Sot pra nisim procesin ndërkombëtar të tenderimit. Ka dy faza, është faza e parakualifikimit dhe më pas i gjithë procesi i vlerësimit të propozimeve paraprake, do të përgatisim një listë të përzgjedhur. Periudha për këtë përzgjedhje të listës fundore do të jetë 45 ditë dhe synimi është që në mars-prill të kemi nënshkrimin e kontratës.”

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.