“Hartimi i legjislacionit, në konsultim me bizneset” – Të krijohet një bazë të dhënash për prodhuesit vendas dhe produktet e tyre

Ledina Elezi/SCAN

 

Bizneset kërkojnë që Ministria e Ekonomisë, Kulturës dhe Inovacionit, të fillojë krijimin e një baze të dhënash ku të përfshihet numri i prodhuesve vendas dhe lloji i produkteve të tyre, me qëllim që të identifikohen sektorët strategjikë dhe bizneset të drejtohen se ku të investojnë. Kjo bazë të dhënash mund të shërbejë si pikënisje për analiza të mëtejshme nga perspektiva konkurruese lokale dhe duhet të përditësohet çdo vit.

Të dhëna të tilla janë të një rëndësie të madhe për MEKI-n për të kryer analizat përkatëse konkurruese për sektor, identifikimin e produkteve ose sektorëve prioritarë, problemet e tyre, ndërtimin e politikave të duhura apo negocimin e marrëveshjeve në nivel rajonal.

Në studimin e realizuar nga Këshilli i Investimeve, rekomandimet e bizneseve kërkojnë veprime dhe rol proaktiv si të institucioneve qeveritare, ashtu edhe të komunitetit të biznesit. Përmirësimi i praktikave të konsultimit publik mund t’i japë një shtysë cilësisë së legjislacionit parësor dhe dytësor të miratuar në vend, veçanërisht atyre që lidhen drejtpërdrejt me direktivat dhe rregulloret e BE-së që shpesh janë të ndërlikuara, mbartin detaje dhe transpozimi i të cilave kërkon ekspertizë specifike sektoriale.

Prandaj, përfshirja më e madhe e aktorëve në fazën e hartimit të legjislacionit në lidhje me cilësinë dhe standardet, do të ndërgjegjësojë, lehtësojë zbatimin dhe do të minimizojë rastet kur ato dështojnë me zbatimin e legjislacionit dhe janë subjekt i sanksioneve dhe masave kufizuese nga inspektorate të ndryshme.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.