Hungaria fillon ‘kundërpërgjigjen’ për të frenuar fuqinë e Parlamentit të BE-së!

Hungaria ka nisur të lëvizë për të frenuar fuqitë e Bashkimit Europian (BE). Ligjvënësit në vend miratuan një rezolutë që kërkon reduktimin e fuqisë së Parlamentit të BE-së, duke pretenduar se ajo e kishte sjellë demokracinë europiane në një “udhë pa krye”.

I miratuar nga anëtarët e partisë Fidesz të Hungarisë, e cila drejtohet nga Viktor Orbán, rezoluta dëshiron t’i japë parlamentit të vendit aftësinë për të ‘thyer’ legjislacionin e propozuar në nivel të BE-së. Kjo do të zvogëlonte aftësinë e Parlamentit Europian për të nxjerrë ligje që prekin Hungarinë dhe do të minonte fuqinë e bllokut në përgjithësi.

“Demokracia europiane duhet të nxirret nga ngërçi në të cilin e ka drejtuar Parlamenti Europian”, thuhet në rezolutë. “Bashkimi Europian duhet të ndryshojë sepse është i papërgatitur për sfidat e kohës sonë”. Rezoluta, e cila u miratua me 130 vota pro dhe 50 kundër, thoshte gjithashtu se ligjvënësit e BE-së duhet të vihen në pushtet nga qeveritë kombëtare. Kjo është në kontrast me sistemin aktual ku ata zgjidhen nga votuesit në vendet e tyre përkatëse.

Masa e parlamentit hungarez vjen pas një vendimi të BE-së për të mbajtur miliarda fonde rimëkëmbjeje dhe kredi nga Hungaria për shkak të shqetësimeve që qeveria e saj e krahut të djathtë nuk po respekton sundimin e ligjit ose nuk po trajton korrupsionin.

Hungaria ka thyer gjithashtu radhët me shumicën e vendeve anëtare të BE-së duke kritikuar politikën e bllokut për sanksionimin e Rusisë për shkak të pushtimit të Ukrainës. Javët e fundit, Budapesti është bërë më i hapur dhe pajtues ndaj kërkesave të BE-së, teksa përpiqet të marrë në dorë fondet shumë të nevojshme nga blloku.

Monedha e Hungarisë kohët e fundit arriti në nivelet më të ulëta rekord kundrejt euros dhe dollarit dhe ekonomia e saj po përjeton inflacionin më të lartë në gati 25 vjet. Pjesë të rezolutës që duan të transferojnë një pjesë të madhe të aftësisë ligjbërëse të BE-së në parlamentet kombëtare mund të antagonizojnë zyrtarët e BE-së, duke komplikuar luftën e Budapestit për të hyrë në kazanin e parave shumë të llojllojshëm.

Formulimi i rezolutës mund të shkaktojë gjithashtu fërkime midis Hungarisë dhe Brukselit. I autorizuar nga anëtarë të lartë të partisë nacionaliste të Orbanit, i cili vetë është një kritik i vendosur i BE-së, dokumenti thotë se traktatet aktuale të bllokut “nuk janë një bazë adekuate për bashkëpunim në një kohë krize”.

Daily News Hungary raporton se rezoluta e parlamentit propozon që BE-ja gjithashtu duhet të njohë “rrënjët dhe kulturën e krishterë” të Europës, ndërsa bën thirrje për ndalimin e bllokut nga marrja e ndonjë borxhi të mëtejshëm. Ai shton se objektivi i integrimit më të plotë të anëtarëve në mënyra europiane duhet të fshihet nga traktatet e BE-së dhe se konteksti kristian i Europës duhet të kodifikohet në traktate si bazë e integrimit europian.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.