Informaliteti i Pagave, “armiku i pensioneve” – Inspektorati i Punës: Identifikohet rritje me 29% e punëmarrësve informalë

Ernilda Luzi/ Scan

 

Qeveria ka nisur një aksion kundër infomalitetit, që synon deklarimin real të pagave dhe shëndoshjen e skemës së pensioneve. Pa shifra konkrete mbi fenomenin e nëndeklarimit të pagave të punonjësve, ku një pjesë e saj hidhet në bankë e tjera jepet në dorë, qeveria zhvilloi fushatën ‘sensibilizuese’ për bizneset, për deklarimin real të pagave.

Planifikimi i Inspektimeve nga Inspektorati Shtetëror i Punës dhe Shërbimeve Shoqërore me bazë risku ka sjellë përmirësime të ndjeshme, duke identifikuar një rritje prej 29% të punëmarrësve informalë gjatë proceseve inspektuese, krahasuar me të njëjtën periudhë të vitit 2023.

Sipas të dhënave zyrtare, janë futur në skemë 1,984 punëmarrës informalë, nëpërmjet masës urgjente “pezullim aktiviteti”, duke kontribuar direkt në skemën e sigurimeve shoqërore dhe shëndetësore me një vlerë minimale prej 22 milionë e 141 mijë lekë pas deklarimit në buxhet.

Pak ditë më parë kryeministri Edi Rama u bëri apel sipërmarrjeve që të deklarojnë pagat reale të punonjësve, në të kundërt do të përballen me penalitete të rënda, deri në mbyllje të aktiviteteve. Gjithashtu plani i inspektimeve do të intensifikohet, në vijim do të ngrihet edhe një task-forcë investiguese për ta dhe toleranca ndaj informalitetit do të jetë zero. Çdo formë pune jashtë kësaj skeme është abuzim që duhet denoncuar.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.