Investimi 4 mld dollarësh i Amazon, nën hetim – Marrëveshja rrezikon të dëmtojë konkurrencën në Britani

Kristi Ceta / SCAN

 

Investimi 4 miliardë dollarësh i gjigantit të tregtisë elektronike Amazon në kompaninë amerikane të inteligjencës artificiale Anthropic është duke u hetuar zyrtarisht nga një rregullator i konkurrencës në Mbretërinë e Bashkuar.

Autoriteti i Konkurrencës dhe Tregjeve tha se ka filluar një hetim i fazës së parë për investimin dhe partneritetin e Amazon me Anthropic për të vlerësuar nëse marrëveshja mund të dëmtojë konkurrencën në Angli. Zëdhënësi i Amazon tha se ishte “i zhgënjyer” nga vendimi. Sipas tij, partneriteti me Anthropic “nuk ngre ndonjë shqetësim për konkurrencën dhe nuk plotëson kushtet për rishikim”.

Pas shqyrtimit fillestar të marrëveshjes, Rregullatori i Konkurrencës u shpreh se ka “informacion të mjaftueshëm” për të nisur një hetim zyrtar. Autoriteti ka deri në 40 ditë pune për të vendosur nëse transaksioni mund të dëmtojë konkurrencën dhe për këtë arsye duhet të shqyrtohet më tej në një hetim të thelluar të fazës së dytë.

Rregullatorët në mbarë botën po e kthejnë gjithmonë e më shumë vëmendjen e tyre ndaj aleancave që krijohen midis ‘Big Tech’ dhe bizneseve të inteligjencës artificiale. Këto lidhje kanë shkaktuar shqetësime se kompanitë më të mëdha në botë do të kenë një ndikim të madh mbi mënyrën se si do të zhvillohet teknologjia e re dhe cilët do të jenë përfituesit më të mëdhenj.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.