Investitorët tërheqin fitimet – Bitcoin zbret poshtë $38,000, SHBA sanksionon “mikserin” Sinbad

Tregu i kriptomonedhave po qëndron në rritje të lehtë në sesionin e sotëm, pas humbjeve të realizuara një ditë më parë, si një reagim i investitorëve ndaj vendimit të SHBA për të vendosur sanksione ndaj të ashtuquajturit mikser të monedhave virtuale.

Departamenti i Thesarit tha në një deklaratë se mikseri i monedhave virtuale Sinbad, i cili u godit me sanksione të mërkurën, përpunoi monedha virtuale në vlera prej miliona dollarësh nga grabitjet e kryera nga Grupi Lazarus i lidhur me Korenë e Veriut, duke përfshirë grabitjet Axie Infinity dhe Horizon Bridge. Lazarus, që është sanksionuar nga SHBA, është akuzuar për kryerjen e disa prej vjedhjeve më të mëdha të monedhave virtuale deri më sot.

Në mars 2022, dyshohet se vodhi rreth 620 milionë dollarë në kriptomonedha nga një projekt në “blockchain”, i lidhur me lojën online, Axie Infinity. FBI deklaroi në janar se Lazarus ishte përgjegjës për vjedhjen e 100 milionë dollarëve nga firma amerikane e kriptomonedhave, Horizon Bridge.

Një mikser i monedhave virtuale është një softuer që grumbullon dhe përzien kriptovalutat nga mijëra adresa. Ndërkohë, kapitalizimi i tregut të kriptomonedhave ra me 0.5% në 24 orët e fundit, në 1.42 trilion dollarë. Analistët e arsyetojnë rënien e djeshme të bitcoin edhe me tërheqjen e fitimeve nga investitorët afatshkurtër.

Megjithatë, në terma afatgjatë, banka Standard Chartered ritheksoi projeksionin e mëparshëm se bitcoin do të arrijë një vlerë prej 100,000 dollarë deri në fund të vitit 2024, për shkak se miratimi i ETF-ve në Shtetet e Bashkuara do të shërbejë si forcë shtytëse. Gjithashtu, Standard Chartered citoi edhe “përgjysmimin” e ardhshëm të bitcoin, një ngjarje që kufizon ofertën e monedhës dhe që parashikohet të ndodhë në 17 prill 2024.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.