Italia teston mësimdhënien e asistuar nga “IA” – Qeveria synon përdorimin e teknologjisë së re në shkollat e vendit

Kristi Ceta/SCAN

 

Italia po prezanton inteligjencën artificiale në shkollat ​​e saj ndërsa qeveria e kryeministrit Giorgia Meloni po eksploron mënyra të reja për të zhvilluar aftësitë digjitale të vendit.

Ministri i Arsimit Giuseppe Valditara tha se softueri i asistuar nga IA do të testohet në 15 klasa në katër rajone, me synimin për të zgjeruar skemën më vonë nëse eksperimenti do të jetë i suksesshëm.

Mjetet e inteligjencës artificiale në tabletët dhe kompjuterët e klasës do të veprojnë si “asistentë virtualë që mund ta bëjnë mësimin më të lehtë për studentët dhe të ndihmojnë mësuesit të identifikojnë metodat për një edukim gjithnjë e më specifik”, tha ministri.

Italia ka një nga rezultatet më të këqija të aftësive bazë digjitale në 27-anëtare të BE-së, sipas agjencisë statistikore të bllokut Eurostat, duke qenë më mirë vetëm se Letonia, Polonia, Bullgaria dhe Rumania.

Megjithatë, për nismën u dhanë pak detaje. Ministria nuk ishte në gjendje të konfirmonte emrat e shkollave që do të testonin teknologjinë e re dhe do të zgjeronin funksionimin e saj.

Shtytja e Italisë për teknologjinë e re në shkolla ​​erdhi pasi ministri ndaloi përdorimin e telefonave celularë në klasa, madje edhe për qëllime arsimore.

Përpjekjet e kaluara për të digjitalizuar shkollat ​​italiane kanë rezultuar të vështira, përfshirë gjatë pandemisë COVID, pjesërisht për shkak të moshës së avancuar të stafit mësimdhënës, pasi më shumë se gjysma e tyre ishin të moshës 50 vjeç e lart, sipas të dhënave.

Meloni e ka trajtuar inteligjencën artificiale si një çështje kryesore të samitit të këtij viti të G7, që u organizua nga Italia. Në komunikatën e tyre përfundimtare, udhëheqësit thanë se do të thellojnë “bashkëpunimin e tyre për të shfrytëzuar përfitimet dhe për të menaxhuar rreziqet e kësaj teknologjie”.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.