Jeni japonez bie në nivelin më të ulët të 24 viteve kundrejt Dollarit! – Cilat janë pasojat ekonomike?

Jeni japonez ka rënë në nivelin më të ulët kundrejt dollarit amerikan që nga gushti 1998, duke e shtyrë qeverinë të peshojë veprimet.

Rritja e dollarit vjen nga të dhënat që sugjerojnë se tregu i punës i ekonomisë më të madhe në botë po rimëkëmbet.

Të enjten, çifti i monedhave shkeli nivelin kryesor psikologjik prej 140 jen kundrejt dollarit amerikan.

Ndërsa shumë banka qendrore në Azi e kanë rritur koston e huamarrjes për të pasqyruar SHBA-në, Japonia nuk e ka ndjekur shembullin.

Banka e Japonisë ka ruajtur normat e saj jashtëzakonisht të ulëta të interesit për të mbështetur rimëkëmbjen ekonomike, dhe kjo është një nga arsyet që jen ka rënë në vlerë kundrejt dollarit amerikan dhe monedhave të tjera kryesore.

Normat më të larta të interesit priren të tërheqin investime të huaja. Kjo rrit kërkesën dhe vlerën e monedhave nga vendet me norma më të larta interesi.

Një raport i Departamentit të Punës të SHBA të enjten tregoi se numri i amerikanëve që paraqisnin kërkesa të reja për përfitimet e papunësisë ra në nivelin më të ulët në dy muaj, duke sugjeruar se tregu i punës po rimëkëmbet pas pandemisë.

Kjo nxiti interesin për blerjen e dollarit amerikan, i cili e çoi atë në një nivel të ri kundrejt monedhës japoneze, në 140.23 jen.

Por nuk ishte e vetmja monedhë e prekur nga forca e dollarit. Paundi britanik ra me rreth 5% për herë të parë që nga tetori 2016.

Dollari amerikan fitoi vrull në fillim të javës, pasi kryetari i Rezervës Federale, Jerome Powell tha se banka qendrore e SHBA do të vazhdojë të rrisë normat e interesit në muajt e ardhshëm.

Powell shtoi se Fed mund t’i mbajë normat e larta “për ca kohë” në një konferencë vjetore në Jackson Hole, Wyoming.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.