Korea e Jugut planifikon iniciativën e “gjelbër” – Synon përdorimin e karburantit të qëndrueshëm për fluturimet

Kristi Ceta/ SCAN

Korea e Jugut synon të sigurojë që të gjitha fluturimet ndërkombëtare të përdorin një përzierje prej rreth 1% të karburantit të qëndrueshëm të aviacionit (SAF) nga viti 2027.

Vendi ka si qëllim të përgatitet për reduktimin e karbonit që bëhet i detyrueshëm për anëtarët e Organizatës Ndërkombëtare të Aviacionit Civil (ICAO) pas 3 vitesh, sipas ministrive të industrisë dhe transportit.

“Si eksportuesi numër 1 në botë i karburantit të aviacionit, Korea e Jugut ka nevojë për mbështetje të guximshme politike për t’u përgatitur për tregun e qëndrueshëm, si një motor premtues i rritjes në përgjigje të zgjerimit të kërkesës globale,” u shprehën zëdhënësit.

Gjashtë linja ajrore të vendit, përfshirë Korean Air, kanë filluar të përziejnë 1% të karburantit të qëndrueshëm me lëndën djegëse për një linjë ndërkombëtare një herë në javë, duke nisur nga ky vit.

Kjo alternativë prodhohet nga lëndët fillestare bujqësore dhe mbetjet ushqimore. Kërkesa për të pritet të rritet në 18.35 milion ton në 2030, nga 240,000 tonë që ishte në 2022, sipas të dhënave nga Shoqata Ndërkombëtare e Transportit Ajror.

Për industrinë e rafinimit të naftës, qeveria tha se po shqyrton lehtësime më të gjera tatimore për investimet në zhvillimin e karburantit të qëndrueshëm, si dhe stimuj për të lehtësuar barrën e kostove të larta të prodhimit në të ardhmen.

Në vitin 2022, Korea eksportoi karburant avioni me vlerë prej 14.8 trilionë dollarësh. Megjithatë, vendi mbetet pas shteteve si SHBA dhe Kina në sektorin e gjelbër. Në nivel global, ekzistojnë 323 objekte prodhimi të karburantit të qëndrueshëm, asnjë prej të cilave nuk ndodhet në Korenë e Jugut.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.