Kursimi i parave publike në tenderë – APP, institucioneve: Si të vlerësoni ofertat e favorshme, bazuar në kosto

Ola Mitre / SCAN

 

Vlerësimi i drejtë i ofertave në tenderë nga pikëpamja e kostove është në fokus të një udhërrëfyesi të hartuar nga Agjencia e Prokurimit Publik, për autoritetet kontraktore, duke synuar kursimin e parave publike dhe shërbime më cilësore.

Udhërrefyesi vjen pas miratimit të ligjit të ri “Për prokurimit publik”, sipas të cilit institucionet kanë të drejtë që të zgjedhin midis dy opsioneve të lejueshme të kritereve të vlerësimit: oferta ekonomikisht më e favorshme bazuar në çmim dhe oferta ekonomikisht më e favorshme bazuar në kosto. Mundësia e parë nënkupton se fitues në tender shpallet kompania që ka ofertuar çmimin më të ulët. Ndërkohë që, në rast se përzgjidhet opsioni i dytë, fitues mund të shpallet edhe një kompani me çmim më të lartë, por që sipas vlerësimeve që duhet të kryejë institucioni që kërkon të blejë të punë, mall apo shërbim, rezulton më e favorshme.

Sipas APP-së vlerësimi në këtë formë është një vendim i rëndësishëm sa i takon pasojave dhe efekteve që sjell në procesin e prokurimit publik, ashtu sikurse edhe në hapat e tjerë të këtij procesi. Ndaj, është e rëndësishme që institucionet të aplikojnë siç duhet formulat përkatëse që zbatohen në rastin e përdorimit si kriter vlerësimi të “ofertës ekonomikisht më të favorshme bazuar në kosto”.

Ky opsion nënkupton se përveç çmimit, enti kontraktor merr në konsideratë kritere shtesë, sikurse janë cilësia, kualifikimi dhe përvoja e stafit, shërbimi pas shitjes dhe asistenca teknike, kushtet e dorëzimit, etj. Udhërrëfyesi i hartuar nga APP përfshin edhe shembuj konkretë, ndërsa specifikon se kriteret e vlerësimit duhet të jenë jodiskriminuese, dhe të mos dëmtojnë konkurrencën e ndershme; proporcionale dhe transparente.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.