Mashtrimet përmes kriptovalutave – Shtetasit amerikanë humbën 5.6 mld dollarë në vitin 2023

Kristi Ceta/SCAN

 

Shtetasit amerikanë humbën më shumë se 5.6 miliardë dollarë vitin e kaluar përmes skemave të mashtrimit që përfshinin kriptovalutat, tha FBI në një raport që tregon një rritje prej 45% të humbjeve në krahasim me 2022.

FBI grumbulloi rreth 70,000 ankesa në vitin 2023 nga viktimat e mashtrimit financiar që përfshinte bitcoin, eter dhe kriptovaluta të tjera. Skema më e shfrenuar ishte mashtrimi për investime, që përbënte 3.96 miliardë dollarë të humbjeve.

“Natyra e decentralizuar e kriptomonedhës, shpejtësia e transaksioneve të pakthyeshme dhe aftësia për të transferuar vlera në mbarë botën e bëjnë kriptomonedhën një mjet tërheqës për kriminelët, ndërkohë që krijon sfida për të rikuperuar fondet e vjedhura”, specifikojnë raportet e FBI-së.

Mashtruesit shpesh kontaktojnë përmes aplikacioneve të takimeve ose mediave sociale për të krijuar besim gjatë disa javësh ose muajsh përpara se të sugjerojnë investimin në kriptomonedhë, thonë burimet brenda FBI-së. Pasi ndërtohet marrëdhënia, ata i bindin objektivat që të përdorin faqe interneti ose aplikacione të rreme për të investuar paratë e tyre, ndonjëherë edhe duke i lejuar viktimat të tërheqin shuma të vogla parash në fillim për ta bërë atë të duket legjitime.

Në disa raste, personat më pas janë në shënjestër të bizneseve false duke pretenduar se do ta ndihmojnë viktimën të rikuperojë kriptomonedhat që humbi.

Zyrtarët thonë se amerikanët e të gjitha moshave mund të jenë objektiv i mashtrimeve të tilla dhe duhet të jenë jashtëzakonisht të kujdesshëm kur u paraqiten mundësi investimi nga njerëz që nuk i kanë takuar kurrë në jetën reale.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.