Mbi 600 individë dalin të papunë çdo muaj – Pagesë papunësie për 1 vit, mosha 55-60 vjeç ka numrin më të lartë të përfituesve
![](https://scantv.al/wp-content/uploads/2022/07/papunesiaaaa.jpg)
Në vendin tonë, mesatarisht afro 600 individë hyjnë në skemën e papunësisë dhe përfitojnë mbështetjen financiare çdo muaj. Sipas të dhënave zyrtare të Agjencisë Kombëtare për Punësim dhe Aftësim referuar vitit postpandemik 2021, u vu re një rënie e ndjeshme e numrit të përfituesve të pagesës së papunësisë nga 5,738 punëkërkues të papunë përfitues që rezultonin në Janar 2021, ky numër u ul në 2,914 punëkërkues të papunë në muajin Dhjetor 2021.
Në skemën e pagesës së papunësisë gjatë periudhës 12 mujore kanë hyrë mesatarisht 656 përfitues çdo muaj, ku peshën specifike më të madhe e zënë personat që vijnë nga zvogëlimi i aktivitetit ose prishje e kontratave të punës. Si rezultat i mbarimit të afatit të tra- jtimit, nga skema e pagesës së papunësisë kanë dalë mesatarisht 866 përfitues çdo muaj.
Bazuar në periudhën e përfitimit, sipas të dhënave Agjencisë Kombëtare për Punësim dhe Aftësim, vihet re se numri më i lartë vazhdon t’i përkasë periudhës së përfitimit prej 12 muaj.
Kjo për dy arsye: periudha e kontributeve mbi 10 vjet dhe grupmosha mbi 55 vjeç për gratë dhe mbi 60 vjeç për burrat. Vërehet gjithashtu se këto dy grupmosha vazhdojnë të zënë dhe numrin më të madh të përfituesve të së ardhurës nga papunësia në total.
Fondi i shpenzuar gjatë vitit 2021 në këtë program është 930.6 milion lekë ose 99.2% e fondit të rishikuar dhe 116.3% e fondit të akorduar në buxhetin e vitit 2021.
Ky trend është përfitimi të pagesës së papunësisë është thuajse i njëjtë për çdo vit, ku diferencë ka bërë vetëm viti 2020 për shkak se shumë qytetarë humbën masivisht vendet e punës si pasojë e mbylljes së ekonomisë në kuadër të masave anticovid.
Elisabeta Dosku / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.