Mbi 86 mijë familje me panele diellore – Eksperti tregon përfitimet: Reduktohet deri në 40% fatura e dritave

Ada Hazizolli / SCAN

Rënia e çmimeve por edhe programet subvencionuese të aplikuara nga Qeveria, thonë ekspertët kanë nxitur familjet shqiptare në instalimin e paneleve diellore që shërbejnë për ngrohjen e ujit.

Rezultatet e Censit, publikuar në fund të muajit qershor, treguan se janë 11.4 për qind e familjeve zotërojnë panele diellore ose rreth 86 mijë familje, nga 2.7 për qind që ishin në vitin 2011.

Azmer Duleviç, inxinier elektrik tregon edhe përfitimet nga instalimi i këtyre paneleve, të cilat çojnë në reduktim të faturës së dritave deri në 40 për qind.

Nga studio e emisionit “Box to Box” Duleviç i ka konsideruar me rëndësi programet subvencionuese të ndërmarra në dy vitet e fundit, ndërsa shton që do të ishte me rëndësi që e njejta politikë të ndërmerrej edhe për panelet fotovoltaike, të cilat kanë një kosto edhe më të lartë.

Në fazën e parë të programit, që u aplikua thuajse dy vite më parë përfituan 2 mijë familje, kryesisht në Tiranë dhe Durrës, të cilat u subvencionuan në masën 70 për qind nga buxheti i shtetit.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.