Më pak humbje energjie në rrjet – OSHEE: 5.6 mln euro kursim, në janar – shtator niveli i humbjeve arriti në 17.23%
Ola Mitre / SCAN
Niveli i humbjeve në rrjetin e shpërndarjes për 9 – mujorin e parë të këtij viti u regjistrua në 17.23%, apo 1.53 % më pak se e njëjta përiudhë e vitit 2023, kur përllogariteshin në 18.76%. Të dhënat janë publikuar nga Operatori i Shpërndarjes së Energjisë Elektrike, duke treguar dhe përfitimet financiare të shoqërisë nga përmirësimi i këtij treguesi. Sipas OSHEE, humbjet e 9-mujorit 2024 janë rreth 55,300 mWh më pak se periudha janar – shtator 2023 apo 5.6 mln euro, bazuar në çmimet aktuale të tregut.
Humbjet e energjisë në rrjet vijnë për 2 arsye. E para lidhet me rrjetin e amortizuar, që konsiderohen si humbje teknike, ndërsa e dyta përfshin humbjet joteknike apo thënë ndryshe vjedhjet. Gjatë këtij viti janë raportuar një sërë investimesh në rrjet, çka mund të kenë ndikuar në përmirësimin e humbjeve, por edhe aksionet për ndërprejen e lidhjeve të paligjshme nga OSHEE nuk kanë munguar. Sipas këtij dikasteri, gjatë periudhës janar – shtator janë ushtruar mbi 16 mijë kontrolle, tek subjektet që paraqesin mundësi abuzimi me energjinë elektrike.
Ndërkaq, vetë Operatori i Shpërndarjes së Energjisë Elektrike ka bërë publik objektivin për uljen e sasisë së energjisë që humbet në rrjet në 17.93%, deri në fund të këtij viti. Ky target konsiderohet ambicioz, duke marrë në konsideratë se tejkalon objektivat e vendosur nga qeveria për reduktimin e humbjeve.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.