Më pak transaksione të kryera përmes telefonit – Qytetarët preferuan degët e bankave në qershor

Ledina Elezi/SCAN

 

Më pak qytetarë dhe biznese e kanë përdorur internetin për të kryer transaksione në muajin qershor. Sipas të dhënave nga Banka e Shqipërisë, numri dhe vlera e veprimeve bankare të kryera përmes telefonit ka pësuar një rënie drastike. Rreth 746 mijë është numri i transaksioneve të kryera me home banking, vlera e të cilave kap një shifër prej 190 milionë lekësh. Në gjysmën e parë të vitit janë realizuar 4.3 milionë veprime bankare përmes internetit nga shtëpia, ku shuma totale e këtyre transaksioneve arriti në 1.1 miliardë lekë në fund të qershorit.

Nëse bëjmë një krahasim me muajin maj, vërehet se gjatë qershorit janë kryer gati 51 mijë transaksione më pak me home banking, ndërsa dhe vlera e tyre është ulur me 19 milionë lekë. Për sa i përket numrit të transaksioneve, kjo është rënia më e madhe e regjistruar që prej fillimit të vitit, ndërsa për sa i takon vlerës së tyre, një rënie e tillë, por më e vogël, është shënuar edhe në muajin prill.

Kontributin më të madh në rritjen e numrit dhe vlerës totale të transaksioneve në gjashtëmujorin e parë të vitit, e ka dhënë muaji maj, ku nga të dhënat e Bankës së Shqipërisë rezulton se atëherë qytetarët dhe bizneset e kanë përdorur më tepër internetin për të kryer pagesa dhe veprime të tjera bankare.

Duke parë tendencën e viteve të tjera, edhe ky vit pritet të shënojë një rekord të ri për sa i përket fluksit të përdoruesve të home banking, i cili parashikohet ta tejkalojë shifrën prej 7.6 milionë transaksionesh të vitit të kaluar.

Home banking i referohet shërbimeve bankare që mund të aksesohen nga shtëpia,  përmes internetit, ose telefonit. Shumica e bankave ofrojnë shërbime digjitale që u mundësojnë klientëve të kryejnë transaksione të ndryshme përmes internetit, të cilat përfshijnë shikimin e bilancit të llogarisë, rishikimin e transaksioneve, kryerjen e pagesave, transferimin e parave dhe të tjera.

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.