Më shumë financime për klimën – FMN u kërkon anëtarëve të G20 të përmbushin angazhimin për të siguruar 100 mld USD
![](https://scantv.al/wp-content/uploads/2022/10/fmn-22-765x383.png)
Kreu i Fondit Monetar Ndërkombëtar (FMN), Kristalina Georgieva, theksoi urgjencën e rritjes së burimeve të alokuara për organizmin financiar botëror përpara fundit të këtij viti. Georgieva u bëri thirrje gjithashtu vendeve anëtare të G20 që të përmbushin angazhimin e tyre për të siguruar 100 miliardë dollarë në vit për fondet e klimës.
Gjatë samitit në Nju Delhi gjatë fundjavës, G20 publikoi një deklaratë ku zotohej të trajtojë dobësitë e borxhit me të cilat përballen vendet me të ardhura të ulëta dhe të mesme në një mënyrë të plotë, gjithëpërfshirëse dhe sistematike. Megjithatë, G20 nuk prezantoi ndonjë plan të ri veprimi.
Në një deklaratë përmbyllëse pas samitit dyditor, Georgieva deklaroi se anëtarët e G20 duhet të japin shembullin duke përmbushur premtimet e tyre prej 100 miliardë dollarësh në vit për financimin e klimës dhe kjo duhet të arrihet duke forcuar bankat e zhvillimit shumëpalësh.
Vendet gjithashtu duhet të mobilizojnë burimet e brendshme për të financuar dhe menaxhuar tranzicionin e gjelbër përmes reformave tatimore, shpenzimeve publike efektive dhe efikase, institucioneve të forta fiskale dhe tregjeve të borxhit lokal.
Ajo i kërkoi grupimit të forcojë rrjetin global të sigurisë financiare. “Për ta bërë ekonominë globale më të fortë dhe më elastike në një botë më të prirur ndaj goditjeve, është jetike të arrihet një marrëveshje për të rritur burimet e kuotave të FMN-së përpara fundit të vitit,” tha ajo.
Një pakt i tillë do të siguronte burimet e nevojshme për mbështetjen pa interes të Fondit për vendet më të varfra përmes programit për Reduktimin e Varfërisë dhe Rritjen Ekonomike, shtoi ajo. Samiti i G20 u zotua gjithashtu për të forcuar dhe reformuar bankat e zhvillimit shumëpalësh, duke pranuar një propozim për të rregulluar më shumë tregun e kriptovalutave në mbarë botën.
Dorian Koça/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.