Më shumë stacione rimbushje për makinat – BE arrin marrëveshjen për zgjerimin e kësaj infrastrukture

Bashkimi Europian arriti të martën një marrëveshje të përkohshme për vendosjen e më shumë stacioneve të shërbimit për makinat me energji elektrike dhe lëndë djegëse alternative, ndërsa blloku kërkon të reduktojë dioksidin e karbonit në sektorin e transportit.

Sipas marrëveshjes, stacionet e rimbushjes për makinat elektrike të gjeneratës së fundit duhet të instalohen çdo 60 kilometra brenda vitit 2026 në rrugët kryesore të rrjetit prioritar të transportit europian. Për mjetet e rënda dhe autobusët stacionet duhet të jenë çdo 120 kilometra. Impiantet e furnizimit të hidrogjenit duhet të instalohen çdo 200 kilometra brenda vitit 2031.

“Marrëveshja do t’u dërgojë një sinjal të qartë qytetarëve dhe grupeve të tjera të interesuara se infrastruktura miqësore për rimbushjen dhe stacionet për karburantet alternative, si hidrogjeni, do të instalohen në të gjithë BE,” tha Andreas Carlson, ministri suedez për infrastrukturën dhe strehimin. Suedia aktualisht mban presidencën e BE.

Duke komentuar më tej atë që ai e quajti një “marrëveshje të përkohshme politike” midis Këshillit dhe Parlamentit Europian, Carlson shtoi se, qytetarët nuk do të kenë më arsye të ndihen të shqetësuar për gjetjen e stacioneve të karikimit dhe karburantit. Ai shtoi se ishte qëllimi i bllokut për të vënë në dispozicion më shumë kapacitet rimbushjeje në rrugë në zonat urbane, si dhe përgjatë autostradave.

Ndërkohë, Bashkimi Europian planifikon të zhvillojë ankande të hershme të tregut të karbonit, duke filluar nga korriku, për të mbledhur fonde shtesë për të ndihmuar vendet të largohen nga gazi rus dhe të reduktojnë emetimet.

BE planifikon të mbledhë 20 miliardë euro grante nga tregu i saj i karbonit, me 8 miliardë euro që vijnë nga shitjet e lejeve të karbonit të mbajtura më herët se sa ishte planifikuar. Komisioni Europian tha se deri në 16.5 milionë leje shtesë të tregut të karbonit do të shiten në ankand në fillim të vitit 2023.

Dorina Kurtaj/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.