Meta fiton çështjen kundër grupit “anti-vaksinë” – Hidhen poshtë akuzat për censurim informacioni

Kristi Ceta / SCAN

 

Meta Platforms ka fituar çështjen e ngritur nga Mbrojtja e Shëndetit të Fëmijëve, një grup kundër vaksinave i themeluar nga Robert F. Kennedy Jr., i cili sfidonte censurimin e postimeve në Facebook që përhapin dezinformata rreth efikasitetit dhe sigurisë së vaksinave.

Gjykata e Apelit në Pasadena, Kaliforni, tha se organizata jofitimprurëse nuk vërtetoi se Meta punonte ose ishte detyruar nga zyrtarët federalë për të shtypur pikëpamjet kundër vaksinave.

Mbrojtja e Shëndetit të Fëmijëve ngriti padi në vitin 2020, duke thënë se Meta kishte shkelur të drejtat kushtetuese duke e cilësuar si të rremë “dezinformimin rreth vaksinave” dhe duke i hequr të drejtën grupit për të reklamuar në Facebook.

Veprimet e Metës përfshinin ndalimin e përdoruesve për të ndarë pretendimet se vaksinat Covid-19 nuk funksionojnë, si dhe referimin e postimeve të grupit të Kennedy Jr. në Organizatën Botërore të Shëndetësisë për fakte rreth Covid-19.

Gjykata saktësoi se Meta ishte një kompani private me të drejtën e Amendamentit të Parë për të mos përdorur platformën e saj për të promovuar pikëpamje që i konsideronte të pakëndshme. Sipas vendimit, kompania beson se vaksinat janë të sigurta dhe efektive e përdorimi i tyre duhet të inkurajohet.

Gjykata hodhi poshtë gjithashtu pretendimet e Mbrojtjes së Shëndetit të Fëmijëve kundër Institutit Poynter dhe Science Feedback, të cilat ndihmojnë Metën të vlerësojë saktësinë e përmbajtjes në Facebook. Grupi i Kennedy Jr. tha se ishte i zhgënjyer me vendimin dhe do të merrte parasysh opsionet ligjore.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.