Ndërvarësia e madhe e Europës dhe Kinës – Sponsorët më të mëdhenj të Euro 2024 janë kompanitë kineze

Kina dhe Bashkimi Europian ranë dakord të ecin përpara me bisedimet për planin “27” për të vendosur tarifa shtesë për automjetet elektrike të prodhimit kinez. Pekini dëshiron që ato të shfuqizohen. Negociatat për të finalizuar vendimin para afatit të nëntorit, megjithatë, nënvizojnë shqetësimin për ecurinë e marrëdhënieve tregtare dypalëshe në të ardhmen.

Çështja kërcënon ekonominë prej 18 trilionë dollarësh më shumë se prodhuesit e saj të automjeteve, të cilët mund të mbijetojnë edhe pas tarifave të BE-së, të cilat variojnë nga 17.4% në 38.1% për shkak se sanksionet nuk e fshijnë plotësisht avantazhin e çmimit të automjeteve elektrike kineze në tregun global. Për Kinën, automjetet elektrike janë vetëm maja e ajsbergut, pasi janë një burim eksportesh me rritje të shpejtë.

Mjafton të shikojmë kampionatin e futbollit Euro 2024, i cili po zhvillohet këto ditë, për të kuptuar interesin e Kinës për tregun perëndimor. BYD ka marrë përsipër nga prodhuesi gjerman i automjeteve Volkswagen përgjegjësinë si sponsori kryesor i turneut; prodhuesi kinez i elektronikës Hisense Home Appliance po sponsorizon ekranet e TV dhe teknologjinë VAR, ndërsa aplikacioni i pagesave digjitale Alipay, një degë e Alibaba, është partneri global i pagesave. Pekini nuk do të dëshironte të shtonte një betejë tregtare të plotë me BE-në në përshkallëzimin e luftës me SHBA-në edhe pse Kina paralajmëron se do të marrë çdo masë të nevojshme për të mbrojtur interesat e saj.

Për të mbrojtur veten, Kina po propozon uljen e tarifave të importit për automjetet me motor të madh nga Europa, nëse Berlini mund të bindë BE-në për të ulur tarifat shtesë për automjetet elektrike kineze. Prodhuesit kinezë të automjeteve mund të krijojnë gjithashtu ndërmarrje të përbashkëta me homologët europianë, ashtu siç dikur prodhuesit e huaj të automjeteve ishin të detyruar të bënin biznes në Kinë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.