“Nevojë urgjente për të ulur borxhin publik” – Mattarella: Italia duhet të përmbushë kërkesat e BE-së deri në 2026

Kristi Ceta/SCAN

 

Presidenti i Italisë Sergio Mattarella vuri në dukje se vendi ka një “nevojë të pashmangshme” për të ulur borxhin e madh publik, por paralajmëroi se perceptimi i tregjeve ishte një tregues “i dyshimtë” i besueshmërisë financiare të një kombi.

Duke folur nëpërmjet një lidhjeje me video në forumin ekonomik Teha në Cernobbio, Mattarella u shpreh se kostoja e borxhit të Romës ishte shumë më e lartë se e fqinjëve për shkak të normave të interesit.

“Italia është një debitore e nderuar, me një histori 30-vjeçare të suficiteve primare vjetore të qeverisë, me një borxh publik që është rritur në masë të konsiderueshme që nga viti 1992, kryesisht për shkak të interesit”, tha Mattarella.

Borxhi publik i Italisë, i dyti më i madh në eurozonë si përqindje e prodhimit, është nën vëzhgim të ngushtë nga agjencitë e vlerësimit dhe aktualisht shihet nga Thesari duke u rritur në gati 140% të PBB-së deri në vitin 2026.

Mattarella tha në forum se borxhi i Italisë arriti në gati 2.9 trilion euro në 2023 dhe Roma pagoi pak më pak interes se Gjermania dhe Franca së bashku.

“Kjo nuk është një ftesë për të neglizhuar borxhin: Unë jam plotësisht i vetëdijshëm për nevojën e pashmangshme për ta ulur atë,” u shpreh Mattarella.

Italia, së bashku me Francën dhe vendet e tjera nën Procedurën e Deficitit të Tepruar të BE-së (EDP), do të duhet të paraqesë projekt-planet buxhetore në Komisionin Evropian për të ulur nivelet e deficitit dhe borxhit të tyre.

Procedura e detyron Italinë të ulë deficitin strukturor buxhetor me 0.5% ose 0.6% të PBB-së në vit.

Burimet thonë se në planin strukturor afatmesëm të buxhetit që do të prezantohet këtë muaj, qeveria e kryeministrit Giorgia Meloni do t’i përmbahet një angazhimi për të sjellë raportin e saj të deficitit ndaj PBB-së nën kufirin prej 3% të BE-së në vitin 2026.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.